Áýejaılardaǵy qustardy úrkitý úshin qandaı ádister qoldanylady
ASTANA. KAZINFORM – Qazaqstan áýejaılarynda ushaqtardyń qustarmen soqtyǵysýynyń aldyn alý úshin akýstıkalyq, vızýaldy, pırotehnıkalyq jáne lazerlik qurylǵylar qoldanylady. Bul týraly Qazaqstannyń avıatsııalyq ákimshiligi Kazinform agenttiginiń resmı saýalyna bergen jaýabynda aıtty.
Vedomstvo málimetinshe, áýejaılarda qustardy baqylaý arnaıy bekitilgen baǵdarlamalar negizinde júrgiziledi. Osy baǵdarlamalar aıasynda olardyń shoǵyrlanatyn oryndary anyqtalyp, qustardy tartýy múmkin nysandarǵa nazar aýdarylady.
– Áýeaılaqtardy paıdalanýshylar áýejaı aýmaǵy men oǵan irgeles jerlerdi belgili bir ýaqyt saıyn tekserip otyrady. Qajet bolǵan jaǵdaıda qustardyń jınalýyna jol bermeý úshin tıisti sharalar qabyldanady. Qustardy úrkitý tásili olardyń túrine, minez-qulqyna, sanyna, jyl mezgiline jáne naqty qaýip deńgeıine qaraı tańdalady, - delingen jaýapta.
Kóktemgi jáne kúzgi kóshi-qon kezinde baqylaý jumystary kúsheıtiledi. Bul kezeńde áýejaı aýmaǵyn patrýldeý jıilep, qustardy úrkitý sharalary belsendi júrgiziledi.
Máselen, Nursultan Nazarbaev halyqaralyq áýejaıynda qustardy úrkitý úshin gaz zeńbirekteri, statsıonarlyq jáne avtokólikke ornatylǵan bıoakýstıkalyq júıeler, mehanıkalyq quraldar, qol lazerleri, dybystyq jáne pırotehnıkalyq qurylǵylar paıdalanylady.
Áýejaı málimetinshe, qajet bolǵan jaǵdaıda birneshe ádis qatar qoldanylady. Mamandar qustardyń belgili bir dybysqa nemese qurylǵyǵa úırenip ketpeýi úshin úrkitý tásilderin almastyryp otyrady.
Avıatsııalyq ákimshiliktiń túsindirýinshe, atalǵan jumystardyń negizgi maqsaty – áýeaılaq aýmaǵynda qustardyń shoǵyrlanýyna jol bermeý jáne ushý qaýipsizdigin qamtamasyz etý.
