Áýejaılarda kıberqylmysqa qarsy aqparattyq naýqan uıymdastyryldy
ASTANA. KAZINFORM — Kólik polıtseıleri áýejaılarda kıberqylmystyń aldyn alý sharalaryn ótkizdi, dep habarlaıdy ІІM baspasóz qyzmeti.
«Zań jáne tártip» qaǵıdatyn iske asyrý aıasynda kóliktegi polıtsııa departamentiniń kıberqylmysqa qarsy is-qımyl bóliminiń qyzmetkerleri elimizdiń birqatar áýejaıynda kıberqylmystyń aldyn alýǵa baǵyttalǵan profılaktıkalyq is-shara uıymdastyrdy.
— Atap aıtqanda, Astana, Almaty, Óskemen, Qaraǵandy, Qyzylorda, Petropavl, Oral, Shymkent, Taraz jáne Aqtaý qalalaryndaǵy áýejaılarda «Kıberqylmystyń aldyn alý jáne oǵan qarsy is-qımyl» taqyrybynda anımatsııalyq beınerolıkter kórsetildi. Beınematerıaldar kútý zaldary men kireberis aımaqtardaǵy LED-ekrandar arqyly myńdaǵan jolaýshylarǵa usynyldy, — delingen habarlamada.
Іs-sharanyń negizgi maqsaty — azamattardyń kıberqylmys túrleri men olardan qorǵaný joldary týraly aqparattandyrý deńgeıin arttyrý, sondaı-aq ınternet keńistiginde qaýipsiz minez-qulyq daǵdylaryn qalyptastyrý. Sonymen qatar bul bastama halyqtyń quqyqtyq jáne tsıfrlyq saýattylyǵyn jetildirýge baǵyttalǵan.
Mamandardyń aıtýynsha, tehnologııalardyń qarqyndy damýy men ınternet-alaıaqtyq derekteriniń kóbeıýi jaǵdaıynda azamattardy kıberqaýipter týraly habardar etý erekshe mańyzǵa ıe. Beınerolıkterde fıshıngtik siltemeler, bank qyzmetkerleri atynan jasalatyn jalǵan qońyraýlar jáne messendjerler men áleýmettik jelilerdegi alaıaqtyq tásilder sııaqty keń taralǵan shemalar túsindirildi.
Sonymen qatar jeke derekterdi qorǵaý, onlaın-qyzmetterdi qaýipsiz paıdalaný jáne kúmándi aqparattyń shynaıylyǵyn tekserý máselelerine erekshe nazar aýdaryldy. Kólik polıtseıleri azamattardy ınternet arqyly jasalatyn operatsııalar kezinde barynsha muqııat bolýǵa jáne qupııa aqparatty úshinshi tulǵalarǵa bermeýge shaqyrdy.
Budan buryn Shymkentte kıberqylmys jasaǵany úshin 37 adam jaýapqa tartylǵanyn jazdyq.
