Áýejaılarda elden shyǵýǵa salynǵan shekteýdi alyp tastaıtyn termınaldar iske qosyldy
ASTANA. QazAqparat - Qazaqstannyń iri áýejaılarynda aıyppul tóleý boıynsha termınaldar iske qosyldy, dep habarlaıdy «QazAqparat» HAA tilshisi.
«Búgin Astana, Almaty, Shymkent, Qaraǵandy jáne Aqtaý qalalarynyń áýejaılarynda óndiristik qaryzdar men aıyppuldardy táýlik boıy tóleýge arnalǵan termınaldar ornatyldy. (...) Aldaǵy ýaqytta mundaı termınaldardy respýblıkanyń barlyq áýejaılaryna ornatý josparda bar», - dedi QR Ádilet departamenti sot aktilerin oryndaý departamentiniń dırektory Ernar Ibraev.
Tóleý barysynda ustalatyn komıssııa 1% - eń kemi 100 teńge. Nátıjesinde, el aýmaǵynan shyǵýǵa shekteýler 15 mınýt ishinde avtomatty túrde alynyp tastalady. Biraq, boryshkerler tizimine 2015 jyldyń shilde aıynan keıin engender ǵana bul qyzmetti qoldana alady. Sebebi, 2015 jyldyń shildesine deıingi shekteýler qaǵaz júzinde jarııalanǵan jáne júıege engizilmegen.
E.Ibraevtyń aıtýynsha, termınal arqyly alıment, shyǵyndy óteý sekildi merzimdi tólemderdi tóleýge bolmaıdy jáne 2 mıllıon teńgeden astam tólemder qabyldanbaıdy. Sebebi, olar QR Qarjy mınıstrliginiń monıtorıngine tıesili.
«Biz Qarjy mınıstrligine shekteýlerdi alyp tastaý úshin máseleni múmkindiginshe sheshý týraly ótinish jazǵanbyz», - dep tolyqtyrdy ol.
Sondaı-aq, bul qurylǵy arqyly kommýnaldy tólemder men salyqtardy, uıaly baılanys qyzmetine tólem jasaý múmkindigi qarastyrylýda.
Ázirge apparat Astana áýejaıynyń eski termınalyna ornatylǵan. Halyqaralyq áýejaıdyń jańa termınaly tehnıkalyq turǵyda daıyn bolǵanda, apparat sonda aýystyrylady.
