Áýejaılar men vokzaldarda koronavırýs profılaktıkasynyń jańa sharalary bekitilmek

NUR-SULTAN. QazAqparat – Kóliktegi Bas memlekettik sanıtarlyq dáriger Janar Orazalına elorda aýmaǵyndaǵy koronavırýs ınfektsııanyń aldyn alýǵa baǵyttalǵan profılaktıkalyq sharalar tizbesin bekitti.

Tıisti qaýly quzyrly organnyń saıtynda jarııalandy, dep habarlaıdy QazAqparat tilshisi.

Qaýlyǵa sáıkes, turaqty jolaýshylar tasymalyn júzege asyratyn uıymdardyń basshylary myna sharalardy qamtamasyz etýge mindetti:

- kólik quraldaryndaǵy aýa baptaý, jeldetý júıelerine tekserý júrgizý jáne jeldetkish súzgilerdi aýystyrýǵa;

- arnaıy kólik quraldaryn (perrondyq avtobýstardy) qospaǵanda, jolaýshylardy otyrǵyzý oryndarynyń sanynan aspaıtyn mólsherde kólik quralyna jiberýge jol bermeýge;

- kólik quralynyń salonyn jeldetý, dezınfektsııalaý, sapar aıaqttalǵannan keıin jolaýshylar janasqan jerlerdi súrtýge;

- jeke qorǵaný quraldarynyń, qolǵa arnalǵan antıseptıkterdiń, dezınfektsııalaý quraldarynyń jetkilikti qorynyń bolýyna;

- personaldyń jeke qorǵaný quraldaryn (maskalardy), qolǵa arnalǵan antıseptıkterdi mindetti túrde paıdalanýǵa;

- kólik quralynda jolaýshylardy koronavırýs ınfektsııasynyń aldyn alý sharalary týraly habardar etýdi jáne jeke qorǵanysh quraldaryn (maskalardy) paıdalanýdy usynýǵa.

Halyqaralyq áýejaı, temirjol vokzaldary, teńiz jáne ózen porttarynyń basshylary myna sharalardy qamtamasyz etýge mindetti:

- aýa temperatýrasy men ylǵaldylyq deńgeıin qolaıly saqtaý úshin úshin jeldetý, tazalaý, jýý, dezınfektsııalaý, súzgilerdi aýystyrý jáne basqa da jumystar júrgizýge;

- jolaýshylar bolatyn jerlerdi jýý jáne dezınfektsııalaý quraldaryn qoldana otyryp, tolyq tazalaý jumystaryn júrgizýge, súrtýge;

- jolaýshylar men kelýshiler bolatyn jerlerde (kútý zaldary, ana men bala bólmeleri), kireberiste nemese sanıtarııalyq toraptarda qoldy óńdeýge arnalǵan sanıtaızerler ornatýǵa;

- qyzmetkerler arasynda COVID-19 kezinde jeke qorǵanys quraldaryn paıdalaný algorıtmi boıynsha jeke/qoǵamdyq gıgıena qaǵıdalaryn saqtaý qajettiligi, kvarts shamdaryn paıdalaný kezindegi qaýipsizdik sharalary týraly nusqaý, sondaı-aq saqtalýyn baqylaýǵa;

- personaldy jeke qorǵanysh quraldarymen (maskalar, antıseptıkter) jabdyqtaýǵa;

- jolaýshylarǵa 60 mınýtta keminde 1 ret radıo arqyly koronavırýs ınfektsııasynyń aldyn alý sharalary týraly habardar etýge.

- óńirdiń epıdemıologııalyq jaǵdaıyn baǵalaý matrıtsasyna sáıkes, «jasyl» jáne «sary» aımaqta bolǵan kezde halyq kóp jınalatyn oryndarda medıtsınalyq nemese matadan tigilgen maskalardy qoldanýdy usynsyn.

Kóliktegi Bas memlekettik sanıtarııalyq dáriger usynǵan qaýly qol qoıǵan kúnnen bastap kúshine enedi.