Áýejaıǵa Elbasy esiminiń berilýi álemdik úrdis aıasyndaǵy zańdy sheshim - Erlan Sydyqov
ASTANA. QazAqparat - Astana halyqaralyq áýejaıyna Elbasy Nursultan Nazarbaevtyń esiminiń berilýi álemdik úrdis aıasynda qabyldanǵan zańdy sheshim. Bul pikirdi «QazAqparat» tilshisine L.Gýmılev atyndaǵy Eýrazııa ulttyq ýnıversıtetiniń rektory Erlan Sydyqov bildirdi, dep habarlaıdy QazAqparat.
«QR Tuńǵysh Prezıdenti - Elbasy Nursultan Nazarbaev esiminiń Astana áýejaıyna berilýin tolyqtaı qoldaımyn. Bul logıkalyq zańdy sheshim. Olaı deıtinimiz, tek qana áýejaıdyń emes, osy elordamyzdyń da avtory, sáýletshisi Prezıdent Nazarbaev ekendigi eshkimge daý týdyrmaıdy. Jalpy, Astananyń ǵana emes, Táýelsiz elimizdiń negizin qalaýshy tulǵa ekendigi belgili. Astanaǵa kelgen ár jolaýshy, ár qonaqtyń birinshi kelip túsken jeri áýejaı bolatyn bolsa, onda sol jerden bastap olar bul qalanyń avtory, negizin qalaýshy kim ekendigin túsinýi kerek», - dedi Erlan Battashuly.
Sonymen qatar ýnıversıtet rektory bul aıaq astynan oılap tabylǵan dúnıe emestigine, tarıhta bar tájirıbe ekendigine basa nazar aýdartty.
«Kóptegen memleketterdiń basty áýejaılary sol eldiń negizin qalaýshylardyń ne bolmasa sol elge úlken eńbek sińirgen saıası qaıratkerlerdiń esimimen atalady. Máselen, Djon Kennedı, Geıdar Álıev, Atatúrik, Vashıngton atyndaǵy áýejaılar bar. Olaı bolatyn bolsa biz Astana halyqaralyq áýejaıyna Elbasynyń esiminiń berilýin sol álemdik úrdistiń aıasynda, sol tájirıbelerdiń negizinde qabyldanǵan sheshim dep bilemiz», - dedi Erlan Sydyqov.
