Áýejaıǵa 122 mln teńge zańsyz aıyppul salyndy: «Almaty sý» prokýratýra sheshimimen kelispeıdi
ALMATY. KAZINFORM — Óńirlik kommýnıkatsııalar qyzmetinde ótken brıfıngte «Almaty Sý» memlekettik kommýnaldyq kásipornynyń ótim departamentiniń dırektory Serik Shaǵyrov prokýratýra sheshimimen kelispeıtinin málimdedi.

— Salynǵan aıyppul zańdy. Biz ony dáleldedik. Barlyq aıyppul qoldanystaǵy quqyqtyq aktiniń normalaryna sáıkes shyǵaryldy. Alaıda, biz kelispeıtin prokýrorlyq qadaǵalaý aktisi shyqty. Biz bul akt boıynsha belgilengen talaptar aıasynda shaǵymdanamyz, — dep jaýap berdi spıker.
Eske salaıyq, buǵan deıin Almaty prokýratýrasy áýejaıǵa salynǵan 122 mln teńge aıyppul zańsyz dep tanyǵan bolatyn.
Atap aıtqanda, Túrksib aýdanynyń prokýratýrasy qadaǵalaý aktisin engizip, zańsyz áreketterdiń jolyn kesti. Aıyppul men qosymsha tólemder joıyldy.