Áýejaıdan shyqqan sheteldik týrıst birden aqshaǵa qunyqqan taksı júrgizýshilerine kezigedi – Úkimet basshysy
ASTANA. KAZINFORM – Bıznes tarapy týrıstik aýmaqtardy uqypty paıdalanyp, qoljetimdi baǵamen sapaly servısti qamtamasyz etýge tıis. Bul týraly búgin Úkimet otyrysynda Premer-Mınıstr Oljas Bektenov aıtty.
«Áýejaıdan shyqqan sheteldik týrıst birden aqshaǵa qunyqqan taksı júrgizýshilerine kezigedi. Olardyń oılaǵany qonaqty baratyn jerine qaýipsiz jetkizý emes, barynsha qomaqty aqsha alyp qalý. Vokzaldar men áýejaılarda órkenıetti kólik túrimen qamtamasyz etý týraly ákimdikterge qansha ret tapsyryldy, biraq áli kúnge deıin nátıje joq. Biz mundaı tásilderdi ózgertpeıinshe, syrtqy týrızm keńinen tanymal bolyp qala beredi», - dedi Úkimet basshysy.
Bul rette, Premer-Mınıstr Qazaqstannyń tabıǵaty men ásem jerleri elimizde ekologııalyq, mádenı, zııarat etý jáne emdik-saýyqtyrý týrızmin damytýǵa zor múmkindik beretindigin aıtty.
«Sondyqtan memleket tarapynan týrıstik aımaqtarda ınfraqurylymdy qamtamasyz etip, ınvestorlar úshin qolaıly jaǵdaı jasaý qajet. Óz kezeginde bıznes tarapy týrıstik aýmaqtardy uqypty paıdalanyp, qoljetimdi baǵamen sapaly servısti qamtamasyz etýge tıis. Bul áýe jáne temirjol bıletteriniń baǵasyna da qatysty», - dedi ol.
Oljas Bektenovtiń paıymynsha, shaǵyn azamattyq avıatsııa múmkindikterin de týrızmdi damytýǵa paıdalanýǵa bolady. Ol úshin Kólik mınıstrligi ınfraqurylymdy qaıta qarap, áleýetti ınvestorlardy tartý úshin tıisti jaǵdaı jasaýǵa tıis. Sonymen qatar qaýipsizdik máselelerin pysyqtap, kórshiles eldermen qatar alys shetelderdiń de tájirıbesin zerttep kórý qajet.
«Elimizde tabıǵı týrıstik aımaqtar shalǵaı ornalasqan, sondyqtan shaǵyn avıatsııany damytý óte ózekti bolyp tabylady. Kishigirim ushaqtar men tikushaqtarǵa beton jolaqtar qajet emes, shaǵyn ınfraqurylym salsa jetip jatyr. Mundaı tehnıkamen Óskemennen Qatonǵa nemese Rahman qaınaryna tezirek jetýge bolady. Bul bizdiń tabıǵı jáne tarıhı aımaqtarymyzdyń áleýetin arttyryp, týrlardyń jańa pýlyn qalyptastyrýǵa yqpal etedi», - dedi Premer-Mınıstr.
