Áýejaıdan Nurly jol vokzalyna 40 mınýtta: Astanadaǵy LRT jyldamdyǵy qandaı
ASTANA. KAZINFORM — 2026 jyldyń sońyna deıin elorda joldaryndaǵy júktemeni azaıtatyn LRT jelisin iske qosý josparlanyp otyr. Kazinform tilshisi poıyzdardyń qandaı jyldamdyqpen júretinin, stantsııalar arasyndaǵy jol ýaqyty qansha bolatynyn jáne qalanyń tanymal oryndaryna qanshalyqty tez qatynaýǵa bolatynyn anyqtady.
City Transportation Systems kompanııasynyń agenttikke habarlaýynsha, joba tolyq iske qosylǵan soń, poıyzdar saǵatyna 40-50 km jyldamdyqpen qatynaıdy. Stantsııalar arasyndaǵy jol júrý ýaqyty ýchaskege baılanysty 1,5-3 mınýt bolady. Quramdar arasyndaǵy ınterval — 5-10 mınýt bolmaq.
Kompanııa málimetinshe, áýejaıdan bastap sońǵy Nurly jolǵa deıingi barlyq 18 stantsııany shamamen 40 mınýtta júrip ótýge bolady. Osylaısha, LRT-men júrý ýaqyty keı jaǵdaıda avtokólikpen nemese avtobýspen saparlaý ýaqytynan qysqa bolýy múmkin.
Mysaly, «Ýnıversıtet» stantsııasynan (Nazarbaev Ýnıversıteti aýdany) «Syǵanaq» stantsııasyna (Abu Dhabi Plaza mańy) deıingi jol shamamen 12 mınýt bolady. Salystyrý úshin, onlaın-kartalar deregine sáıkes, bul baǵytta avtokólikpen shamamen 18 mınýtta, al avtobýspen 37 mınýtta jetýge bolady.
Marshrýtpen jáne stantsııalar ataýymen tolyǵyraq myna silteme arqyly tanysýǵa bolady.
Osylaısha, jeńil relsti kólik Astananyń Esil jáne Nura aýdandaryndaǵy avtojoldarǵa túsetin júktemeni azaıtýǵa tıis. Ásirese Sh. Qaldaıaqov, Syǵanaq kósheleri men Qabanbaı batyr dańǵylynda kólik qozǵalysy jeńildeıdi dep kútilýde.
LRT qosýǵa daıyndyq qalaı júrip jatyr
Kazinform agenttigi jol aqysyn tóleý qalaı uıymdastyrylatynyn, jolaýshylarǵa arnalǵan tsıfrlyq servıster jáne mamandardy daıarlaý qaı deńgeıde ekenin surap kórdi.
CTS kompanııasynyń málimetinshe, qyzmetkerlerdi oqytý aldaǵy aılarda aıaqtalady dep josparlanǵan. Jol aqysyn tóleý tásilderi men tarıfter de bekitý satysynda, oǵan qosa elektrondy tólem júıesi ázirlenedi.
Sonymen birge, CTS kompanııasy poıyz qozǵalysyn baqylaýǵa arnalǵan fýnktsıonal bolatynyn habarlady. Bul júıe arqyly jolaýshylar stantsııada kele jatqan quramdy kartadan kóre alady.
Barlyq 18 stantsııa qaýipsizdik pen qoljetimdilik talaptaryna tolyǵymen saı bolady. Onda bılet satyp alýǵa arnalǵan aımaqtar (avtomattandyrylǵan júıelerdi qosa alǵanda), saýda oryndary bar kútý zaldary, sanıtarlyq-gıgıenalyq toraptar men adamdardyń qaýipti aımaqqa shyǵýyna jol bermeıtin júıeler qarastyrylady. Stantsııaǵa kóterilý úshin eskalatorlar ornatylady, sondaı-aq múmkindigi shekteýli turǵyndardyń qajettilikteri úshin lıftiler bolady.
Aıta keteıik, LRT vagondary elordanyń negizgi kósheleri men aýdandary arqyly ótedi. Baǵyt halyqaralyq áýejaıdan bastalyp, Qabanbaı batyr dańǵylymen júrip, «Astana juldyzy» aınalma jolyn, Nazarbaev ýnıversıteti men Botanıkalyq baq janynan ótedi.
Odan ári jeli Syǵanaq kóshesine burylyp, Abu Dhabi Plaza kópfýnktsıonaldy kesheni men Úkimet úıi mańynan ótedi, Arys kópiri men Sh. Qaldaıaqov kóshesin kesip ótip, QR Ulttyq mýzeıi janynan ótedi. Sońǵy núkte — Nurly Jol vokzaly.
Aıta keteıik, Astanada LRT júıesine qyzmetkerlerdi qabyldaý bastaldy.
Sonymen birge, LRT jobasynyń ekinshi kezeńine daıyndyq bastaldy.