Áýejaıdaǵy oqıǵa: «Dos-Muqasan» ansambli ánshisine aıyppul salyndy
NUR-SULTAN. QazAqparat - Áýejaıdaǵy oqıǵadan keıin «Dos-Muqasan» ansambliniń ánshisi Murat Qusaıynovqa 5 AEK kóleminde aıyppul salyndy. Bul týraly Nur-Sultan qalalyq sotynyń baspasóz qyzmeti málim etti, dep habarlaıdy QazAqparat tilshisi.
«Nur-Sultan qalasynyń mamandandyrylǵan aýdanaralyq ákimshilik soty anyqtalǵan faktini usaq buzaqylyqqa jatqyzyp, Murat Qusaıynovqa 5 AEK kóleminde, ıaǵnı 12 625 teńge somasyna ákimshilik aıyppul belgiledi», - delingen habarlamada.
Nur-Sultan qalalyq sotynyń málimetinshe, M. Qusaıynov elordadaǵy halyqaralyq áýejaıdaǵy tekserý sharalarynan ótý kezinde kedendik tekseris qyzmetkerlerine qatysty balaǵat sóz aıtqan.
Sot qaýlysy zańdy kúshine engen joq.
Eske sala keteıik, bıyl sáýir aıynda «Eır Astana» kompanııasy polıtsııaǵa «Dos-Muqasan» ansambliniń belgili ánshisi Murat Qusaıynov óz qyzmetkerine qol kóterdi dep shaǵym túsirdi.
Bul oqıǵa 14 cáýirde «Nur-Sultan-Almaty» baǵytyndaǵy KS852 reısinde bolǵan edi. Keıinnen M. Qusaıynov buqaralyq aqparat quraldarynda osy jaǵdaıǵa qatysty óziniń pikirin aıtqan bolatyn.
