Áýejaıdaǵy oqıǵa: Almaty ákimi Musa Ábdiraıymǵa «Erligi úshin» medalin tabystady
ALMATY. KAZINFORM - Memleket basshysynyń tapsyrmasymen Almaty ákimi áýejaı qyzmetkerin qutqarǵan azamatty marapattady.

Erbolat Dosaev tótenshe jaǵdaıda kórsetken erligi men janqııarlyǵy úshin Ábdiraıym Musa Saıranbaıulyn «Erligi úshin» medalimen marapattady. Sondaı-aq Musa Ábdiraıymǵa aqshalaı syıaqy tabystaldy.

52 jastaǵy azamat Almaty halyqaralyq áýejaıynyń ushýǵa deıingi tekserý aımaǵyna kirgen qylmyskerdiń qolyndaǵy pyshaǵyn tartyp aldy. Batyldyq pen shapshańdyqtyń arqasynda ol áýejaı qyzmetkeriniń ómirin saqtap qaldy.
- Qazaqstan Prezıdenti Qasym-Jomart Kemelulyna orasan zor kóńil bólip, qurmet kórsetkeni úshin shyn júrekten alǵysymdy bildiremin. Bizdiń elde árqashan beıbit aspan, kelisim men órkendeý bolsyn, - Musa Ábdiraıym.

Eske salaıyq, Almaty áýejaıynda er adam qyzdy kepilge alyp, kópshilik aldynda pyshaq kezengenin jazǵanbyz.
Musa Ábdiraıym kúdiktige ózin kepilge usynyp, qyzmetkerdiń ornyna turǵan. Er adam tártip saqshylarymen kelissózge alańdaǵan tusta ol kúdiktiniń qolyndaǵy pyshaqty julyp aldy.
Memleket basshysynyń Jarlyǵymen qıyn-qystaý jaǵdaıda kórsetken erligi men janqııarlyǵy úshin Musa Saıranbaıuly Ábdiraıym «Erligi úshin» medalimen nagradtaldy.
Búgin ol Búkilálemdik boks keńesiniń beıbitshilik elshisi boldy.