Áýejaıda jolaýshynyń 2500 dollar, 200 myń teńgesin urlaǵan jigit sottaldy
NUR-SULTAN. QazAqparat – «Atyraý-Nur-Sultan» áýe reısiniń jolaýshysynan 2500 AQSh dollary men 200 myń teńge urlaǵan Qaraǵandy oblysynyń turǵyny ustaldy, dep habarlaıdy QazAqparat tilshisi.
Kóliktegi polıtsııa departamenti baspasóz qyzmetiniń málimetinshe, 2019 jylǵy 24 jeltoqsanda Nur-Sultan qalasynyń halyqaralyq áýejaıyndaǵy jelilik polıtsııa bólimine «Skat» áýe kompanııasynyń «Atyraý-Nur-Sultan» baǵytyndaǵy áýe reısiniń 66 jastaǵy jolaýshysy shaǵymdanǵan. Onyń aıtýynsha, júk bólimshesinde belgisiz adam jeke zattary men 2500 AQSh dollary jáne 200 myń teńge kólemindegi aqsha qarajaty salynǵan júgin urlap ketken. Sondaı-aq, ol júktiń Nur-Sultan qalasyna ushyp kelgende joǵalǵanyn aıtqan.
«Sol kúni-aq kólik polıtseılerimen QR QK 188-babynyń 3 bóligimen, ıaǵnı, iri mólsherde jasalǵan urlyq boıynsha sotqa deıingi tergeý amaldary bastalǵan.
Jedel-izdestirý is-sharalaryn júrgizý barysynda elordalyq áýejaıdyń jelilik polıtsııa bóliminiń krımınaldyq polıtsııa qyzmetkerleri osy reıspen ushyp kelgen jolaýshyny ustady. Ol Qaraǵandy oblysynyń 26 jastaǵy turǵyny bolyp shyqty. Qaskúnem tasymaldaǵysh bagaj lentasynda jábirlenýshige tıesili zattar men aqshalardy jasyryn urlap ketkendigin moıyndady. Urlanǵan zattar men aqsha tárkilenip, ıesine qaıtaryldy.
Nur-Sultan qalasy Esil aýdandyq №2 sotynyń úkimimen azamat qylmystyq quqyq buzýshylyq jasaǵany úshin kináli dep tanylyp, oǵan 3 jyl 6 aı merzimge bostandyǵyn shekteý túrindegi jaza taǵaıyndaldy», - dep atap ótedi departamentten.
