Áýejaıda ózine qol saldy - polıtsııa jańa derekterdi jarııalady

ALMATY. KAZINFORM – Kóliktegi polıtsııa oqıǵa boıynsha túsinikteme berdi.

Almaty áýejaıynyń dárethanasyna jolaýshy ózine qol salmaq boldy.

Almaty qalasynyń áýejaıyndaǵy Jelilik polıtsııa bólimi bastyǵynyń orynbasary Ámirhan Qadyrovtyń aıtýynsha, bul derek boıynsha qylmystyq is qozǵaldy.

- Aldyn ala málimet boıynsha Almaty–Astana baǵytyndaǵy reıstiń jolaýshysy áýejaıǵa ýaqtyly kelip, tirkeý men tekseristen ótkennen keıin ushaqqa otyrǵyzýdy kútken. Belgisiz sebeptermen jolaýshy áýe kemesine otyrmaǵan jáne shamamen tórt saǵat boıy kútý zalynda, sonyń ishinde kafe aýmaǵynda bolǵan. Keıin kútpegen jerden sanıtarlyq bólmege kirip, ózine dene jaraqatyn keltiretin áreketter jasaǵan, - dedi ol.

Ámirhan Qadyrov áýejaıdyń medıtsınalyq qyzmetkerleri alǵashqy kómek kórsetip, ony qalalyq klınıkalyq aýrýhanaǵa jetkizgenin atap ótti. Qazirgi ýaqytta oqıǵanyń barlyq mán-jaıyn anyqtaý úshin tergeý amaldary júrgizilip jatyr.

Eske salaıyq, birneshe kún buryn Almaty áýejaıynda er adam ózin órtemek boldy.

Al bıyl naýryz aıynda Almaty áýejaıynda er adam qyzdy kepilge alyp, kópshilik aldynda pyshaq kezengen bolatyn.