Áýejaıda kannabıspen ustalǵan memqyzmetshi jumysynan qýyldy

ASTANA. QazAqparat - QR Sybaılas jemqorlyqqa qarsy is-qımyl ulttyq bıýrosy Batys Qazaqstan oblystyq departamentiniń qyzmetkeri Almaty áýejaıynda esirtkimen ustaldy. Bul jaıynda QR Memlekettik qyzmet isteri jáne sybaılas jemqorlyqqa qarsy is-qımyl agenttiniń Feısbýktegi jarııalanymynda aıtylǵan, dep habarlaıdy QazAqparat.

«2018 jyldyń 18 naýryzynda Almaty qalasy áýejaıynyń jelilik polıtsııa qyzmetkerleri Sybaılas jemqorlyqqa qarsy is-qımyl ulttyq bıýrosy Batys Qazaqstan oblystyq departamentiniń qyzmetkeri Ǵabıt Nurahanovtan temeki qorabynyń ishindegi  kannabıs (marıhýana) esirtki zaty bar bir tal shylym taýyp tárkiledi», - delingen agenttik aqparatynda.

Vedomstvo málimetinshe, Sybaılas jemqorlyqqa qarsy is-qımyl ulttyq bıýrosy Batys Qazaqstan oblystyq departamentiniń basshysynyń buıryǵymen Ǵ.Nurahanov memlekettik qyzmetshiniń ádep kodeksi normalaryn jáne qyzmet tártibin óreskel buzǵany úshin jumysynan shyǵarylǵan.

«Qazirgi ýaqytta agenttik atalǵan departament basshysyna qatysty aldyn alý sharalaryn qabyldamaǵany jáne tıisinshe baqylaý júrgizbegeni úshin jaýapkershiligin qaraý boıynsha qyzmettik tekserý júrgizip jatyr», - dep atap ótilgen taratylǵan aqparatta.

Illıýstratsııalyq foto