Áýejaıda qandaı sózderdi aıtýǵa bolmaıdy

ASTANA. KAZINFORM — Áýejaıdyń baspasóz qyzmeti áýejaıǵa kelgende bomba, jarylys, qarý týraly tipti «ázildep» aıtýǵa tyıym salynǵanyn eskertedi. 

Bul tyıym salynǵan sózderdi áýejaıda aıtyp qalsańyz, QK 273-baby boıynsha terakt, atys nemese qaýip týraly jalǵan nemese úreı týdyratyn aqparat taratqanyńyz úshin 5000 AEK kóleminde aıyppul salynady, bul degenimiz 20 mln teńgege jýyq qarjy nemese dál sol kólemde qoǵamdyq jumystarǵa tartylýyńyz múmkin, keı jaǵdaılarda 5 jylǵa deıin bas bostandyǵynan aıyrý kózdelgen. 

— Bul jaı ǵana usynys emes. Bul qaýipsizdik pen zań aldyndaǵy jaýapkershilik máselesi. Jalǵan aqparat taratqan adam reısten túsiriledi. Reıs keıinge shegerilip, basqa jolaýshylar tekseristen qaıta ótedi. Al ereje buzǵan adam jelilik polıtsııa ókilderine berilip, tergeý sharalary bastalady. Bir ǵana sóz mıllıondaǵan shyǵynǵa jáne birneshe reıstiń keshigýine ákeledi. Vıdeo túsirip jatsań da, kontent úshin erkindigińe qaýip tóndirme, — delingen habarlamada.

Aıta ketelik elorda áýejaıynda sýyq qarý tapsyrý úshin arnaıy jáshik ornatylǵan edi.