Áýejaıda beıtanys adamnyń sálemdemesin almańyz — polıtsııa eskertý jasady

SEMEI. KAZINFORM — Polıtsııa qyzmetkerleri áýejaıda beıtanys adamnyń sómkesin nemese sálemdemesin alyp júrýge kelisýdiń arty aýyr saldarǵa ákelýi múmkin ekendigin eskertti.

Abaı oblystyq polıtsııa departamentiniń málimetinshe, sálemdemeniń ishinde esirtki, qarý-jaraq, oq-dári, jarylǵysh zattar, qylmystyq jolmen alynǵan aqsha nemese basqa da tyıym salynǵan zattar bolýy yqtımal.

Mundaı jaǵdaıda «tek jetkizip berdim» degen ýáj qylmystyq jaýapkershilikten bosatpaıdy. 

— «Tek 5 mınýt ustaı tursańyz», «vokzalǵa nemese áýejaıǵa deıin alyp júrseńiz», «aqysyn tóleımin», «suraq qoıma» degen sııaqty ótinishter — qaterli belgi. Sondyqtan beıtanys adamnyń sómkesin nemese sálemdemesin qabyldamańyz, tasymaldamańyz. Eger sizge aqsha usynylsa onda birden bas tartyp, múmkin bolsa derekterin, atap aıtqanda kólik nómirin, syrtqy beınesin este saqtańyz. Ózińizge qysym kórsetilse nemese qandaı da kúmán týyndasa dereý 102 nómirine habarlasyńyz, — delingen aqparatta.

Eske salsaq, osyǵan deıin Abaı oblysynda qolaısyz aýa raıynda jolǵa shyqqan júrgizýshilerge aıyppul salynǵany habarlanǵan.