Áýejaıda 1 mln. dollardyń altyn buıymdary tárkilendi
ASTANA. QazAqparat - Ońtústik Qazaqstan oblysynyń bir áýejaıynda Túrkııadan 30 kelige jýyq altyn buıymdaryn alyp ótpek bolǵandar ustaldy.
Bul týraly búgin Astanada ótken baspasóz máslıxatynda QR Qarjy mınıstrligi Memlekettik kirister komıtetiniń resmı ókili Murat Jumanbaı málim etti, dep xabarlaıdy QazAqparat tilshisi.
"Ekonomıkalyq tergeý qyzmeti altyn buıymdarynyń iri partııasyn tárkiledi. Túrik buıymdarynyń jalpy sany - 164 dana, jalpy salmaǵy - 28 keli 706 gramm. Atalǵan taýardyń somasy 1 mln 400 myń AQSh dollary nemese 430 mln. teńgeni qurap otyr", - dedi M.Jumanbaı.
Onyń sózine qaraǵanda, kontrabandalyq jolmen kelgen altyn buıymdary memlekettiń paıdasyna tárkilendi. Kináli azamattarǵa 1000 AEK kóleminde aıyppul salyndy. Budan bólek, olardyń mal-múlki tárkilenedi.
Memlekettik kirister komıtetiniń málimetine sáıkes, jyl basynan beri keden salasynda júzdegen zań buzýshylyqtar anyqtaldy. Memleket bıýdjetine 4,1 mlrd. teńge óndirildi.
