Áýejaı, vokzal jáne porttarǵa ataý berý qaǵıdalary ózgerdi

Jańartylǵan qaǵıdaǵa sáıkes, Qazaqstan men álemdik qaýymdastyq aldynda eńbegi sińgen kórnekti memleket jáne qoǵam qaıratkerleriniń, ǵylym, mádenıet jáne basqa da sala ókilderiniń esimi memlekettik menshik nysandaryna olar qaıtys bolǵannan keıin keminde bes jyl ótken soń ǵana beriledi.

Bul talaptyń el táýelsizdigin nyǵaıtýǵa aıryqsha úles qosqan azamattarǵa qatysy joq.

Sonymen qatar memlekettik menshik nysandaryna ataý berý, olardyń ataýyn ózgertý nemese naqtylaý, transkrıptsııasyn túzetý, sondaı-aq memlekettik jáne memleket qatysatyn zańdy tulǵalarǵa jeke ataý berý kezinde usynylatyn qujattar tizimi naqtylandy.

Endi onomastıka salasyndaǵy ýákiletti organǵa:

— ortalyq memlekettik organnyń nemese jergilikti atqarýshy organnyń ótinishhaty;

— ókildi jáne atqarýshy organdardyń birlesken sheshimi (ortalyq memlekettik organdarǵa qaraıtyn nysandardan basqa);

— zańdy tulǵa ujymynyń jınalys hattamasy;

— nysan basshysynyń usynys haty;

— ataý berýdi nemese ózgertýdi negizdeıtin anyqtamalyq jáne muraǵat materıaldary;

— esimi beriletin tulǵanyń ómirbaıany týraly málimetter;

— ataý berýge nemese ózgertýge baılanysty jumystardy qarjylandyrýǵa qatysty aqparat usynylýy tıis.

Qujattardy qaraý merzimi de aıqyndaldy. Ýákiletti organ qujattardy alǵannan keıin úsh jumys kúni ishinde Respýblıkalyq onomastıka komıssııasynyń qorytyndysyn tıisti ortalyq memlekettik organdarǵa nemese jergilikti atqarýshy organdarǵa joldaıdy.

Komıssııa maquldaǵan jaǵdaıda, ortalyq memlekettik organdar nemese jergilikti atqarýshy organdar nysanǵa ataý berý nemese ony ózgertý týraly sheshim qabyldaıdy. Al zańnamada kózdelgen jaǵdaılarda komıssııanyń qorytyndysy qosa berilip, Úkimet qaýlysynyń jobasy engiziledi.

Qaýly 2026 jylǵy 17 shildeden bastap qoldanysqa engizildi.

Eske salaıyq, Qazaqstan óńirlerinde onomastıka komıssııalarynyń jumys erejeleri jańartylǵan edi.