Áýejaı men taý shańǵysy kýrortyna deıin jumsalatyn ýaqyt kólemi jaǵynan Shymbulaqtyń álemde teńdesi joq - Aleksandr Gýjavın
ALMATY. 11 tamyz. QazAqparat /Erlik Erjanuly/ - Almaty óńirindegi taý shańǵysy týrızmi ındýstrııasy aldaǵy 20 jyldyń ishinde Qazaqstannyń jalpy ishki óniminiń 10 paıyzǵa jýyǵyn beredi. Ony «Chimbulak Development» JShS-niń bas dırektory Aleksandr Gýjavın QazAqparat tilshisine bergen suhbatynda aıtty.
«Almaty qalasy men Almaty óńirindegi taý shańǵysy kýrortyna deıingi ushaqpen 3 saǵattyq ushý beldeýinde 600 mıllıon adam turady eken. Al 4 saǵattyq ushý aımaǵyndaǵy turǵyndardyń sany 1 mıllıardtan asady. Qazirgi tańda birde-bir ta ýshańǵysy kýrorty áýejaımen aradaǵy araqashyqtyq boıynsha maqtana almaıdy. Al Almaty qalasynyń halyqaralyq áýejaıynan Medeýdegi bazalyq stansyǵa 30 mınýtta kelýge bolady. Bul - úlken kórsetkish. Bul -saıahatshylar men ózge de demalýshylar úshin úlken qoljetimdilik», - deıdi Aleksandr Gýjavın. Álemdik tájirıbege qarasaq, jaǵajaı týrızminde ár adam kúnine 50 dollar, al taý shańǵysy týrızminde 250 dollar jumsaıdy eken. Ony «Chimbulak Development» JShS Shymbulaq taýshańǵysy kýrorty jobasyn jasaǵanda basty nazarda ustanǵan. Jalpy qazirgi tańda Shymbulaq álemde taý shańǵysy kýrorttary arasynda áýejaıǵa deıingi ara qashyqtyǵynyń qysqalyǵy, syrǵanaý maýsymynyń ortasha uzaqtyǵy, jyldyq ortasha qar kólemi jaǵynan 1-shi orynda, trassasynyń uzyndyǵy men ondaǵy ortasha ótkizý múmkindigi jaǵynan 11-satyda tur.
Aldaǵy 10 jyldyń ishinde júzege asyrylatyn Shymbulaq taý shańǵysy kýrorty el ekonomıkasyn ártaraptandyrýdaǵy mańyzdy jobalardyń biri sanalyp otyr. Jobany júzege asyrýdyń alǵashqy kezeńinde 600 mıllıon dollar jumsalmaq. A.Gýjavınniń aıtýynsha, memleket tarapynan beriletin bul qarjy master-josparlar jasaýǵa jáne birqatar qajetti ınfraqurylymdar qurýǵa bólinbek. Al onyń esesine konsensýs arqyly jeke bıznes 2 mıllıard dollar kóleminde ınvestıtsııa salmaq.
