Áýejaı mańynda adasyp ketken qostanaılyqqa kómek kórsetildi
QOSTANAI. QazAqparat – Áýejaı mańynda adasyp ketken Qostanaı qalasynyń turǵyny tabyldy, dep habarlaıdy QazAqparat oblystyq polıtsııa departamenti baspasóz qyzmetine silteme jasap.
5 aqpan kúni túngi saǵat 2.30 shamasynda Qostanaı qalasy áýejaıyndaǵy jelilik polıtsııa bólimshesine er adamny adasyp ketkeni týraly habarlama túsedi.
«Polıtsııa qońyraý shalyp, kómek suraǵan azamat áýejaı mańynda tońyp, ózin jaısyz sezinip jatqandyǵyn aıtqan. Áýejaıdyń ushý jolaǵynyń mańyn jelilik polıtsııa bólimshesiniń qyzmetkerleri jaqsy biletindikten, avtopatrýlmen birge izdeýge shyǵady. Kómek suraǵan azamatty taýyp, jedel járdem shaqyrtyp, dáriger qaraýynan keıin polıtseıler ony úıine aparyp tastaǵan», - dedi oblystyq polıtsııa departamenti baspasóz qyzmetiniń jetekshisi Irına Bejenar.
Keıin Qostanaı qalasynyń 37 jastaǵy turǵyny Nıkolaı Sımonovtan polıtseılerdiń atyna alǵys hat kelip tústi.
«Qostanaı qalasy áýejaıyndaǵy jelilik polıtsııa bólimshesiniń qyzmetkeri polıtsııa aǵa serjanty M. Doşanovqa jáne Qostanaı qalasy PB qyzmetkerleri polıtsııa aǵa leıtenanty B. Shaıjanovqa, polıtsııa serjanty M. Mınýkovqa sheksiz alǵysymdy bildiremin.
Qatty tonyp qalǵanyma baılanysty jolymdy jalǵastyra almaı, adasyp kettim. Polıtseıler óz kezeginde meni tabý úshin barlyq múmkinderin paıdalanyp, jedel túrde kómek kórsetti. Ómirime qaýipti jáne ekstremaldy jaǵdaıda maǵan kómekke kelgeni úshin polıtsııa qyzmetkerlerine úlken alǵysymdy bildirgim keledi», - dedi N. Sımonov.
Jalpy, jyl basynan beri Kóliktegi polıtsııa departamentine ondaǵan alǵys hattar kelip túsken.
