Áýejaı qyzmetindegi qazirgi tarıf saıasatyn qaıta qaraýǵa basa mán berý kerek - Memleket basshysy

ASTANA. KAZINFORM - Memleket basshysy óńirlik júk avıahabtaryn damytý jóninde keńes baryynda Úkimetke áýe habtaryn damytýdyń naqty máselelerin shuǵyl túrde sheshý jóninde tapsyrma berdi, dep habarlaıdy Aqordanyń baspasóz qyzmeti.

Jıyn barysynda Prezıdent qordalanǵan máselelerdi sheshýdi keıinge qaldyryp, tıisti qujat qabyldamaı otyrǵan salalyq mınıstrliktiń jumysyn synǵa aldy.

– Áýejaı qyzmetindegi qazirgi tarıf saıasatyn qaıta qaraýǵa basa mán berý kerek. Sońǵy 10 jylda baǵa bir-aq ret, ıaǵnı bıyl ǵana ósti. Tarıfterdi ustap turý ınfraqurylymnyń tozýyna ákeledi. Muny tájirıbe anyq kórsetti. Baǵany qaıta qaraý qalyptasqan jaǵdaıdy ózgertýge kepil bolýǵa tıis. Sonymen qatar baǵanyń kúrt kóterilýin boldyrmaý úshin ońtaılandyrylǵan tásil qoldaný qajet. «Tarıfti ınvestıtsııaǵa aıyrbastaý» qaǵıdatyn engizý aldaǵy jyldary salany damytýdyń negizgi sharty bolýy kerek. Qolaıly iskerlik orta qurý – strategııalyq mindet. Investorlardy muqııat tyńdaǵan jón. Áýejaılardaǵy avıatsııalyq emes qyzmetti shekten tys retteý kóptegen túıtkil týyndatyp otyr. Konkýrstar arqyly kompanııalardy irikteý barysynda bıýrokratııalyq kedergi jasaýdy, kelisimderdiń merzimin shekteýdi toqtatý kerek, – dedi Qasym-Jomart Toqaev.

Osyǵan deıin Memleket basshysy avıaotyn máselesin túbegeıli sheshýdi tapsyrǵan bolatyn.