Áýejaı aýmaǵynan zańsyz berilgen ýchaskelerdi memleketke qaıtarý kerek - Marat Qarabaev
Áýejaılardaǵy arnaıy tehnıka men jabdyqtardyń 50 paıyzy tozǵan. Bul týraly Úkimet otyrysynda Kólik mınıstri Marat Qarabaev aıtty, dep habarlaıdy Kazinform.
«Áýejaılardaǵy arnaıy tehnıka men jabdyqtaryna toqtalatyn bolsaq, olardyń tozý deńgeıi 50 paıyzdy quraıdy, jaqyn arada 230 birlik tehnıkany jańartý qajet. Sonymen qatar, barlyq áýejaılarda mobıldiligi tómen jolaýshylarǵa qajetti jaǵdaılardy qamtamasyz etý úshin múgedekter arbasyn jáne ambýlıft satyp alý mańyzdy másele bolyp tur. Bul jobalardy qarjylandyrý jumystary jeke áýejaılar úshin óz qarajaty nemese jeńildetilgen kredıtteý esebinen atqarylatyn bolady. Al, memlekettik áýejaılar úshin Qarjy mınıstrligimen birlesip bıýdjetten qarajat bólý máselesin pysyqtaýdamyz», - dedi Marat Qarabaev.
Sonymen qatar ol áýejaılarǵa jaqyn jerlerdiń zańsyz berilýi ushý qaýipsizdigine qaýip tóndiretindigin atap ótti.
«Bıyl áýejaı aýmaqtarynda jańa obektilerdiń paıda bolýyna jol bermeıtin zańnamalyq ózgerister qabyldandy. Osyǵan baılanysty ákimdikter áýejaı mańyndaǵy aýmaqta zańsyz qurylysqa jol bermeýge erekshe nazar aýdaryp, buryn berilgen jer ýchaskelerin memleketke qaıtarý jóninde sharalar qabyldaýy qajet», – dedi mınıstr.
