Áýesqoılar arasynda tennısten «Astanalyk Amateur Open - 2011» respýblıkalyq chempıonaty ótedi
ALMATY. 31 mamyr. QazAqparat /Erlik Erjanuly/ - Astanada 4-5 maýsym kúnderi áýesqoı tennısshilerdiń erler arasyndaǵy «Astanalyk Amateur Open - 2011» respýblıkalyq chempıonaty ótedi.
Ony Áýesqoı tennısshiler klýby men QR Tennıs federatsııasy birigip uıymdastyryp otyr. Jarys jeńimpazy 7-9 shilde kúnderi Argentınanyń Býenos-Aıres qalasynda ótetin Devıs kýbogynyń Qazaqstan-Argentına matchyna joldama alady. Oǵan kásibı tájirıbesi joq 25 jastan joǵarǵy barlyq úmitker qatysady. Bul Astana qalasynda jańadan qurylǵan Áýesqoı tennısshiler klýbynyń alǵashqy sharasy bolmaq.
Halyqaralyq tennıs federatsııasy (ITF) Devıs kýbogynyń shırek fınaldyq oıyndaryn alǵashqy kezde 8-10 shilde kúnderi ótedi dep josparlaǵan edi. Ol keıin qala meri men úkimetiniń saılaýyna baılanysty, bir kúnge erte bastalatyn bolyp sheshildi. Parque Roca stadıonynda bolatyn bul básekede jarystyń alǵashqy kúni jekeleı syndar, 8-i - juptyq, al 9-y kúni sońǵy jekeleı saıystar ótetin bolady. Jalpy Devıs kýbogynyń buǵan deıingi kezeńinde Qazaqstan Chehııany, Argentına Rýmynııany utqan bolatyn.
