Áýesqoı botanık aıazǵa tózimdi palma shyǵaryp, onymen elordany kórkeıtpek
ASTANA. QazAqparat - Astana turǵyny áýesqoı botanık Evgenıı Kýdrıak palmanyń aıazǵa tózimdi erekshe túrin shyǵaryp, ony elordada ósirmek.
Evgenııdiń boljamy boıynsha, ol aǵash 35 gradýs aıazdyń ózinde jyl boıy óziniń jasyl túsin joǵaltpaýy tıis. Birneshe jyldan beri Evgenıı Kýdrıak óziniń úıiniń aýlasynda palma ósirip keledi eken. Endi olardy Astananyń basqa jerlerine de sebýdi josparlap otyr. «Onyń esh qıyndyǵy joq, - deıdi botanık. - Men aýlada ıýkka palmasyn ósiremin. Sýyqqa shydaǵandaryn iriktep alyp, úıge kirgizip, odan tuqym alamyn. Al úsip ketkenderdiń tamyryn shaýyp tastaımyn». Evgenıı Kýdrıak 15 jyldan keıin selektsııa nátıjesinde 40 gradýsqa deıingi aıazǵa tózimdi palmalardy shyǵaratynyna senimdi. Atap óteıik, ıýkka - soltústikamerıkandyq palma. Ol asa bıik bolmasa da jaıylyp ósedi. Bıiktigi shamamen eki metrge jýyq. «Negizinde ıýkka 20 gradýsqa deıin sýyqqa tózimdi. Biraq odan qatty sýyqqa ol shydamaıdy. ıÝkkadan sýyqqa tózimdi ósimdik shyǵarý úshin az-maz eńbektený kerek. Bul meniń bıznes-jobam. Osy arqyly aqsha tapqym keletinin de jasyrmaımyn. Palma - bul ádemi ósimdikterdiń biri. Ol adamǵa optımıstik kóńil-kúı syılaıdy. Shamamen 30 jyldan keıin meniń palmalarym Astanada jaıqalyp turady», - degen úmitin bildirdi Evgenıı.
