Áýesqoı balyqshylar Jaıyq jaǵalaýynan 15 tonna qoqys jınady
ATYRAÝ. QazAqparat - Áýesqoı balyqshylar Jaıyq jaǵalaýynan 15 tonna qoqys jınady. 20 erikti temirjol kópirinen aınalma jol kópirine deıingi 700 metrlik jaǵalaýdy tazartty, dep habarlaıdy QazAqparat tilshisi.
Óńirlik kommýnıkatsııalar qyzmetiniń habarlaýynsha, 11 tamyzda ótken «Balyqshy Atyrau 1» áýesqoı balyqshylar klýby uıymdastyrǵan aktsııa negizinen halyqtyń ekologııalyq tártibin saqtaýǵa jáne sýdyń lastanbaýyna, sondaı-aq, demalys maýsymy kezinde jaǵalaý aımaǵyn jaqsartýǵa baǵyttalǵan.
Klýbtyń qatysýshylary jınalǵan qoqystyń basym kópshiligi plastıkalyq jáne shyny bótelkelerden, polıetılendi paket jáne 90-shy jyldardan qalyp ketken qoqystan turatynyn aıtady. Sonymen qatar, «Spetsavtobaza» JShS-nyń eki júk kóligi jáne tıegish mashınasy jınalǵan qoqysty arnaıy polıgoǵa jetkizdi.
Uıymdastyrýshylar osyndaı sharany dástúrli túrde ótkizýge nıetti.
«Bul - erikti bastama. Kóptegen adamdar qorshaǵan ortany taza ustaýǵa daıyn. Bizdiń maqsatymyz - tabıǵatymyzdy saqtaýdyń qanshalyqty mańyzdy ekenin kórsetý. Kelesi demalys kúnderi biz «Jılgorodok» yqshamaýdanynan «Balyqshy» yqshamaýdanyna deıingi jaǵalaý mańyn tazalaıtyn bolamyz. Barsha qatysamyn deıtin jandardy qatarymyzǵa qosamyz. Ýaqyt óte kele biz jaǵalaýdy qaldyqtardan tolyq aryltamyz», - deıdi «Balyqshy Atyrau 1» áýesqoı balyqshylar klýbynyń uıymdastyrýshysy Altynbek Pshenbaev.
Aıta keteıik, «Balyqshy Atyrau 1» áýesqoı balyqshylar klýbynda qazir shamamen 170 adam bar. Buǵan deıin, klýb músheleri Teńdik jáne Jumysker aýyldarynda tazalyq jumystaryn júrgizgen bolatyn.
