«Áýeli ekonomıka, sodan keıin saıasat» degen sózdiń máni osyndaıda ańǵarylady - A. Bulashev

Eki tóńkeristiń arasyndaǵy bes jyl ishinde, ókinishke oraı, halyqtyń jaǵdaıynda aıtarlyqtaı jaǵymdy ózgerister baıqalmaı otyr, dedi kórshi eldegi jaǵdaıǵa baılanysty óz pikirin bildirgen S. Seıfýllın atyndaǵy Qazaq agrotehnıkalyq ýnıversıtetiniń rektory Aıtbaı Bulashev.

A. Bulashevtyń aıtýynsha, atalmysh oqıǵanyń óristeýine negizgi túrtki bolyp otyrǵan jaǵdaı - eldiń odan ári kedeılene túsýi. «Tek bir ǵana mysal keltire keteıin. Ár adam basyna shaqqanda kórshilerimizdiń jyldyq tabysy bizdiń elmen salystyrǵanda on eseden astam tómen eken. Basqasha aıtqanda, qyrǵyzdardyń atqa minýiniń negizgi sebebin el ekonomıkasynyń turalap qalýynan izdeý kerek. Al, endi mundaı jaǵdaıda oppozıtsııalyq partııalardyń jandanýy zańdy qubylys. Mine sondyqtan da, altynshy sáýirdegi tolqý el ómirinde oryn alǵan ekonomıkalyq, áleýmettik jáne saıası máselerlerdiń saldarynan paıda bolyp otyr. Onyń ústine naýryz aıynnyń ortasynda oppozıtsııalyq kúshterdiń halyq turmysyn túzetýge, baǵany tómendetýge, jekeshelendirilip ketken strategııalyq mańyzy bar nysandardy keri qaıtarý, qamaýǵa alynǵan oppozıtsııa basshylaryn bosatý jáne taǵy basqa talaptaryna bıliktiń kóńil bólmeýi saıası jaǵdaıdy tipten ýshyqtyryp jiberdi. Al, opozıtsııa bolsa halyqty jetinshi sáýirge josparlaǵan quryltaıyna deıin ustap tura almady. Bul jaǵdaılar sherýge shyqqandardyń buzaqylyq jáne tonaýshylyq áreketterine jol ashyp, qyrǵyz halqynyń abyroıyna úlken daq túsirdi. Keıingi bes jylda eldiń Ata zańynyń úsh márte ózgerýi, bıliktiń áreketterin synaǵan buqaralyq aqparat quraldarynyń, oppozıtsııa ókilderiniń qyspaqqa túsýi Qyrǵyz elinde saıasat máselelerine basyńqylyq berilip otyrǵanyn aıǵaqtaıdy. Bes jyl aralyǵynda bolǵan eki kóterilistiń Orta Azııada eń bir demokratııalyq memleket retinde tanyla bastaǵan eldiń bedeline aıtarlyqtaı kóleńke túsiretinin eshkim joqqa shyǵara qoımas. Mundaı elge eshbir sheteldik ınvestor qarjy ákelmeıdi, bilim, ǵylym jáne mádenıet salasyndaǵy halyqaralyq jobalar búlikshil eldi aınalyp ótedi, al turǵylyqty halyq bolsa óz kásibin basqa elderden izdeı bastaıdy. Osy kezde Elbasymyzdyń «áýeli ekonomıka, sodan keıin saıasat» degen ulaǵatty sózi oıǵa oralady. Álemdi sharpyǵan daǵdarys kezinde bul qaǵıda ózektilene tústi. Sondyqtan da biz qazirgi jaǵdaıda «bir jaǵadan bas bir jeńnen qol shyǵaryp», taǵdyr synaǵynan múdirmeı ótýimiz úshin barlyq kúsh jigerimizdi elimizdiń órkendeýine jumyldyrýymyz kerek. Baqyt pen baqtyń yntymaǵy jarasqan elge qonatynyn esten shyǵarmaǵanymyz abzal bolar. Jalpy alǵanda, álemniń nazaryna ilikken qyrǵyz oqıǵasyna bılik te, oppozıtsııa da jaýapty. Sondyqtan da eki jaq ortaq mámilege kelip, halyqty sabyrlyq pen mádenıettilikke shaqyra otyra, shıelenisti órkenıetti jolmen sheshkeni jón bolar», deıdi rektor.