Áýedegi urys, zymyrandardyń iske qosylýy – Saryshaǵanda oqý-jattyǵý ótti

NUR-SULTAN. QazAqparat –Qaraǵandy oblysynyń «Saryshaǵan» polıgonynda «Jaýyngerlik dostastyq – 2019» taktıkalyq oqý-jattyǵýynyń eń kóztartar belsendi fazasy ótti. Bul týraly QazAqparat QM baspasóz qyzmetine silteme jasap habarlaıdy.

QR Qorǵanys mınıstri Nurlan Ermekbaev áskerı qyzmetshilerdiń daıyndyǵy men kásipqoılyq deńgeıine baǵa berýge keldi.

Áýe shabýylyna qarsy qorǵanys áskerleri men avıatsııasyna shartty qarsylastyń nysanalaryn joıý jóninde tapsyrma berildi. Mı-35M jaýyngerlik tikushaqtary ozyq radıotehnıkalyq bólimsheler, Sý-30SM joıǵysh ushaqtary, basqarý pýnktteri, áýeaılaqtar men shartty qarsylastyń áýe shabýylyna qarsy qorǵanys quraldary boıynsha áýe soqqysyn jasady, al Sý-25 shabýyldaýshy materıaldyq-tehnıkalyq qamtamasyz etý qoımalaryn joıdy. Jappaı shabýyldy MıG-31B joıǵysh ushaqtary jalǵastyrdy. Búgingi tańda bul álemdegi eń jyldam jaýyngerlik ushaqtardyń biri bolyp tabylady. Joıǵysh ushaq saǵatyna 3000 km jyldamdyqqa deıin ushyp, stratosfera qabatyna kóterile alady.

Jerdegi jáne áýedegi nysanalardy joıý úshin avıatsııa «áýe-jer» jáne «áýe-áýe» klasyndaǵy basqarylatyn jáne basqarylmaıtyn avıatsıalyq zymyrandardy, retke keltiriletin avıatsııalyq jáne jarqynshaqty-fýgasty bombalardy qoldandy. Áýe urysyn júrgizýden basqa ushqyshtar stsenarıı boıynsha apatqa ushyrap, isten shyqqan ushaq ekıpajyn qutqarýdy pysyqtady.

Áýe shabýylyna qarsy qorǵanys áskerleri oqý-jattyǵýdyń belsendi fazasy barysynda qanatty zymyranǵa tosqaýyl jasaýdy, sondaı-aq S-200, S-300, S-75, S-125, «Krýg» jáne «Kýb» zenıttik-zymyran keshenderiniń jaýyngerlik múmkindikterin pash etti.

Áskerı qyzmetshilerdiń daıyndyq deńgeıi men sheberlikterine baǵa berýge QR Qorǵanys mınıstri Nurlan Ermekbaev keldi. Ol qatysýshylardy qarsy alyp, Armenııa, Belarýs, Reseı, Tájikstan, Qyrǵyzstan jáne Ózbekstan Qarýly Kúshteriniń basshylyǵyna alǵys bildirdi. Sonymen qatar sheberliktiń joǵary deńgeıin atap ótip, dostastyq armııalardyń áskerı qyzmetshilerine ashyq aspan tiledi.

«Jaýyngerlik dostastyq-2019» halyqaralyq oqý-jattyǵýy Reseı men Qazaqstannyń áskerı polıgondarynyń aýmaǵynda ótkizilgenin esterińizge sala keteıik.

«Saryshaǵan» polıgonyndaǵy oqý-jattyǵýǵa Áýe qorǵanysy kúshteriniń barlyq áskerı bólimderi, áýe shabýylyna qarsy qorǵanystyń tehnıkasy men qarý-jaraǵy, Qazaqstan Áskerı-áýe kúshteriniń avıatsııasy tartyldy. Odan basqa, alǵash ret atalmysh oqý-jattyǵýǵa Qyrǵyzstan ÁShQQ áskerleriniń jaýyngerlik eseptoptary qatysty.