Áýedegi qaýipsizdik: Bortserikter men ushqyshtardy qalaı oqytady
ASTANA. KAZINFORM – Astanadaǵy halyqaralyq áýejaı mańynda AirAstana áýe kompanııasynyń oqý-jattyǵý ortalyǵy ashyldy.
«Ushýǵa arnalǵan oqý-jattyǵý ortalyǵyndamyz. Airbus 320 jattyǵý ushaǵyn biz ushqyshtar men bortseriktesterdiń daǵdysyn praktıkalyq turǵydan jetildirý úshin qoldanamyz. Naqtyraq aıtqanda, tótenshe jaǵdaılar týyndaǵanda bortserikter qalaı qaýiptiń aldyn alyp, jolaýshylardy qutqarý kerektigin úırenedi. Tehnıka qaýipsizdigi boıynsha jumysqa jańa qabyldanǵan bortserikter 1,5 aı oqıdy, onyń ishinde 3 apta teorııalyq bilim alady, qalǵan ýaqytta osy jattyǵý ortalyǵynda praktıkadan ótedi. Airbus 320 jattyǵý ushaǵy barlyq qural-jabdyqpen qamtylǵan. Al, sýdaǵy qaýipsizdik boıynsha jattyǵý elordadaǵy «Barys Arena» sport kesheninde ótedi», - dedi AirAstana áýe kompanııasy qaýipsizdik trenıngteri boıynsha aǵa menedjer Damır Turǵanov.
Oqý-jattyǵý kezinde bortserikter avarııalyq jaǵdaıda jumys isteýdi is júzinde kórip, biledi. Sondaı-aq áýe qyzmetkerleri qaýipti zattardy tasý boıynsha da biliktiligin arttyryp, test tapsyrady.
«Tótenshe jaǵdaı týyndaǵanda basty maqsat – adamdardy qutqarý, olarǵa jol kórsetý, ol úshin tehnıkalyq qaýipsizdikti saqtaı otyryp, nusqaýlyq boıynsha áreket etý mańyzdy. Sonymen qatar bortserikter órt shyqqan jaǵdaıda, ony sóndire bilýi kerek, ol daǵdyny da osy jerden úırenedi. Odan bólek, qajet jaǵdaıda medıtsınalyq alǵashqy kómek kórsetý mindeti bar, oqý-jattyǵý medıtsına mamandarynyń qatysýymen ótedi», - deıdi ol.
Ulttyq standarttarǵa sáıkes, ushqyshtar men bortserikter ár 3 jyl saıyn oqý-jattyǵýdan ótip, daǵdysyn jetildirip otyrýy tıis.
«Ortalyq ashylmas buryn bortserikter men ushqyshtar biliktilikterin shetelde arttyratyn. Bizdiń mamandar Frankfýrt qalasynda (Germanııa), Ystanbul (Túrkııa) qalasynda oqyp keldi. Ol jaqta oqý-jattyǵý ortalyǵyn jalǵa alatynbyz, endi Astanada óz ortalyǵymyz bar. Budan paıda endi shetelge baryp oqýdyń qajeti joq, ekinshiden bıýdjet únemdeledi. Ortalyq elimizde alǵash ashylyp otyr jáne halyqaralyq standarttarǵa saı», - deıdi D. Turǵanov.
Ortalyq ókiliniń aıtýynsha, basqa áýe kompanııalardyń mamandaryn oqytýǵa daıyn.
«Bul jerde jumysqa jańa qabyldanǵan qyzmetkerlermen qatar burynnan jumys istep kele jatyrǵan mamandardy da oqytamyz. Airbus 320 jattyǵý ushaǵy, kezinde Japonııa jáne Eýropa elderine ushqan, keıin esepten shyǵarǵan soń ushaq jattyǵý quralyna aınaldy, onyń ishinde barlyq jabdyq bar», - deıdi áýe kompanııasynyń ókili.
