Áýede quspen soqtyǵysyp qalǵan ushaq áýejaıǵa shuǵyl qonýǵa májbúr boldy
ASTANA. QazAqparat - Amerıkalyq US Airways áýe kompanııasynyń Vashıngtonǵa bet alǵan ushaǵy quspen soqtyǵysyp qalyp, Nıý-Iorktiń La Gýardııa áýejaıyna shuǵyl qonýǵa májbúr boldy, dep habarlady sheteldik BAQ.
Fox News telearnasynyń habarlaýynsha, bortynda 96 jolaýshysy men 5 ekıpaj múshesi bar Airbus A319 ushaǵy áýe kóterilgennen keıin quspen soqtyǵysyp, sonyń saldarynan ushaq áýejaıǵa qaıta oraldy. Osydan keıin jolaýshylar basqa reıspen Vashıngtonǵa attanyp ketti. Zardap shekkender jaıynda esh aqparat joq. Osy oqıǵaǵa baılanysty AQSh Azamattyq avıatsııasynyń federaldy basqarmasy tergeý amaldaryn júrgizýde.
Aıta keterligi, apta ishinde La Gýardııa áýejaıynda dál osyndaı taǵy bir oqıǵa oryn alǵan bolatyn. Sársenbi kúni Chıkago-Nıý-Iork baǵytynda qatynaıtyn United Airlines kompanııasynyń ushaǵy áýejaıǵa qonýǵa kele jatyp quspen soqtyǵysqan edi.
