Áýe júkterin óńdeý úshin Qazaqstan áýejaılaryna JI engiziledi
ASTANA. KAZINFORM — Qazaqstanda IATA e-Freight halyqaralyq standarty boıynsha avıatsııalyq júk logıstıkasyn tsıfrlandyrý aıasynda JI quraldaryn engizý josparlanyp otyr. Protsesterdi tsıfrlandyrý kommertsııalyq qujattardy óńdeý kezinde derekterdi engizýdi jyldamdatýǵa múmkindik beredi, protsedýra ýaqytyn 30 mınýttan birneshe sekýndqa deıin qysqartady. Búgingi Úkimet otyrysynda TransInfoTech kompanııasynyń bas dırektory Málik Berdiǵalıev salany avtomattandyrý týraly aıtyp berdi.
Spıkerdiń aıtýynsha, búgingi tańda e-Freight biryńǵaı platformasyna Qazaqstannyń 17 áýejaıy men 56 avıatasymaldaýshysy qosylǵan. Júıe Azamattyq avıatsııa komıtetine, Qazaqstannyń avıatsııalyq ákimshiligine jáne UQK Shekara qyzmetine júk aǵynynyń tolassyz monıtorıngi men taldaýyn júrgizýge múmkindik beredi.
— Kelesi qadam — elektrondy avıa júk qujattaryn kedendik deklaratsııalaý júıesinde tolyqqandy qujattar retinde taný. Munda Qarjy mınıstrliginiń kómegi kerek. Bul avıatsııalyq júkterdi qaǵazsyz jáne avtomattandyrylǵan túrde tolyqtaı kedendik resimdeý úshin jaǵdaı týǵyzady, halyqaralyq logıstıkany jedeldetedi jáne Qazaqstannyń óńirlik tranzıttik hab retindegi básekege qabilettigin arttyrady, — dep atap ótti Málik Berdiǵalıev.
Joba sheńberinde veterınarııalyq baqylaý bóligin Aýyl sharýashylyǵy mınıstrliginiń aqparattyq júıesimen ıntegratsııalaý tolyǵymen aıaqtaldy. Bul ishki júk tasymalyn elektrondyq avıa júk qujattaryna aýystyrýǵa múmkindik berdi.
— Qazir mundaı jumystar halyqaralyq baǵyttar boıynsha júrgizilýde — KEDEN kedendik resimdeý júıesimen ıntegratsııa aıaqtalýda, ol arqyly taýarlar men júkterdiń kelý faktileri týraly aldyn ala derekter elektrondyq formatqa aýystyrylady, — dedi Málik Berdiǵalıev.
Aıta keteıik, Almatydaǵy Azamattyq avıatsııa akademııasyna bólinetin grant sany jyldan-jylǵa artyp keledi. Túlekterdi jumysqa ornalastyrý kórsetkishi de 90% jetken.
Sondaı-aq, Qazaqstanda Avıatsııalyq ǵylymı-zertteý ınstıtýty qurylady.
