Áýe júkterin óńdeý kólemi jylyna 300 myń tonnaǵa jetkiziledi

ASTANA. KAZINFORM – Qazaqstan áýe júkterin óńdeý kólemin jylyna 300 myń tonnaǵa jetkizbek. Bul týraly Kólik vıtse-mınıstri Maqsat Qalıaqbarov aıtty.

«Áýejaılar Qazaqstannyń kólik júıesiniń mańyzdy bóligi sanalady. Bizdiń basty mindetterimizdiń biri – olarǵa arnaýly ekonomıkalyq aımaq mártebesin bere otyryp, aerohabqa aınaldyrý jáne aldaǵy tórt jylda Qazaqstandaǵy áýe júkterin óńdeý kólemin jylyna 300 myń tonnaǵa deıin eki esege arttyrý. Bul maqsatqa jetý úshin áýejaılarymyzdyń júk tasymaldaý múmkindikterin aıtarlyqtaı keńeıtý qajet», - dedi ol elordada ótken Qazaqstan-Nıderlandy birinshi iskerlik keńesinde.

Vıtse-mınıstr Qazaqstan úshin taǵy bir strategııalyq baǵyt – avtomobıl joldaryn salý jáne jańǵyrtý ekendigine toqtaldy.

«Sapaly jol júıesin damytý óńirler arasyndaǵy tıimdi baılanysty qamtamasyz etedi. Júkterdiń qozǵalysyn jyldamdatady jáne kóliktiń qoljetimdiligin jaqsartady. Biz bul salany ınvestıtsııa tartýdyń negizgi sektorlarynyń biri retinde qarastyramyz», - dedi Maqsat Qalıaqbarov.

Buǵan deıin elimiz 2030 jylǵa qaraı konteınerlik júk tasymalyn 10 mln tonnaǵa jetkizýdi josparlap otyrǵanyn jazǵan edik.