Áýe jáne temir jol kóliginde jolaýshylardy tasymaldaý jıiligin qamtamasyz etý boıynsha sharalar anyqtaldy - QR KKM
ASTANA. 28 jeltoqsan. QazAqparat - QR Kólik jáne kommýnıkatsııa mınıstri Berik Kamalıev QTJ quramyna kiretin «Jolaýshylar tasymaly» AQ men «Qala mańy jolaýshylar tasymaly» AQ,
«Eır Astana» men Skat áýekompanııalary, Almaty jáne Astana áýejaılary basshylarynyń qatysýymen áýe jáne temir jol kóliginde jolaýshylardy tasymaldaý jıiligin qamtamasyz etý boıynsha keńes ótkizdi, dep habarlady vedomstvonyń baspasóz qyzmetinen.
Keńesti ashqan mınıstr keshe Elbasynyń tóraǵalyǵymen Prezıdent Ákimshiligi, Úkimet, «Nur Otan» partııasy qyzmetkerleriniń qatysýymen keńes ótkendigin eske saldy. Aldaǵy jańajyldyq merekeler jáne Májiliske saılaý boıynsha elektoraldy kezeńge baılanysty Prezıdent ár mınıstr osy kezeńde óz salasyndaǵy jaǵdaı men jumysqa jeke jaýapty ekendigin atap ótti, sondaı-aq, áýe reısteri men poıyzdardyń keshigýine Kólik jáne kommýnıkatsııa mınıstri jaýap beretinin naqty atady.
Keńeste jolaýshylar tasymaly jáne jolaýshylar poıyzynyń keshigýi týraly aqparat tyńdaldy. Sonymen qatar, elimizdiń áýekompanııalary men áýejaılary ushýdyń jıiligin qamtamasyz etý boıynsha júıeli jumystar atqarýda ekendigi atap ótildi.
Sáıkes vedomstvolardyń basshylaryn tyńdap bolǵan soń, mınıstr B. Kamalıev kóliktiń barlyq túrine úzdiksiz jumysty qamtamasyz etý kerektigin atap, ár sharýashylyq júrgizýshi sýbektiler aldyna naqty mindetter qoıdy. Osylaısha, áýejaılar men vokzaldar, áýe jáne temir jol kompanııalarynyń birinshi basshylary tasymaldaýdyń jıiligine jeke jaýap beredi. Ár kásiporyn kompanııanyń basshylary arasynan jaýapty tulǵalardy anyqtaý qajet. Osy tulǵalardyń baılanys málimetterin engizip, kezekshilik kestesin qurý jáne azamattyq avıatsııa men qatynas joldary komıtetterine usyný qajet. Barlyq vedomstvoǵa qarasty kásiporyndardyń jumyskerlerine jalaqyny tolyq qamtamasyz etý tapsyryldy. Keleńsiz jaǵdaılarda operatıvti túrde Mınıstrliktiń shtabyna habarlaý qajet.
Sonymen qatar, B.Kamalıev Kókshetaý jáne Petropavl qalalaryndaǵy áýejaılarda eńbek aqysy boıynsha qaryzdardy ýaqytyly óteý máselesin tyńdady. Keńestiń qorytyndysy boıynsha mınıstr hattamalyq tapsyrmalar berdi.
