Áýe tolqynynda jańa radıo - «Jibek Joly»

ASTANA. KAZINFORM – 1 mamyrdan bastap elimizde «Jibek Joly» radıosy habar tarata bastaıdy. Bul - QR Prezıdenti Teleradıokesheniniń jańa medıajobasy.

Jańa radıo 1999 jyldan beri tyńdarmanǵa jaqsy tanys «Astana» radıosynyń bazasynda quryldy jáne 101.4 FM jıiliginde habar taratýdy jalǵastyrady.

«Jibek Joly» − eń talǵampaz aýdıtorııaǵa arnalǵan mýzyka men erkin suhbat, ózekti kontent alańy bolmaq. Radıo jańa talanttardy tanystyryp, Qazaqstannyń zamanaýı mýzykasyn ilgeriletý formattaryn engizedi.

Jas mýzykanttardyń, stendap-komıkterdiń, blogerler men medıatulǵalardyń qatysýymen jańa shoýlar usynylady. Al «Jibek Joly» án festıvalinde Qazaqstannyń jańa mýzykalyq býyn ókilderi tyńdarmanyn qýanta túspek. Olardyń ánderi radıonyń biregeı avtorlyq pleılısine qosylady.

Sonymen birge, «Jibek Joly» radıosy habar taratý aıasyn keńeıte túsip, Ortalyq Azııa elderiniń tanymal oryndaýshylarymen kollaboratsııa jasaýdy kózdeıdi. Radıo transshekaralyq mýzykalyq jobalardy iske qosý, mádenı bastamalardy biriktirý jáne óńirdiń birtutas medıakeńistigin nyǵaıtý sııaqty órshil maqsattar qoıyp otyr.

Radıo 7:00-den 01:00-ge deıin jumys isteıdi. Kún saıyn saǵat 7:00-de Jasulan Aısaǵalı men Dılbar Jumekenova tikeleı efırde «Tańǵy Espresso» shoýyn ótkizedi. Radıonyń bas redaktory Beknur Nurmaǵanbet pen júrgizýshi Qyrmyzy Jandosova «JJ PRIME» keshki shoýyn júrgizedi. Sondaı-aq kúndelikti 8:00-den 20:00-ge deıin ár saǵat saıyn ózekti jańalyqtar berilip otyrady.

Erteń alǵashqy merekelik tańǵy efırdi QR Prezıdenti Teleradıokesheni «Jibek Joly» telearnasynyń juldyzdy júrgizýshileri – Aıgúl Múkeı men Ánýar Kárbozov júrgizedi.

Eske sala ketsek, 16 sáýirde elordada ótken II Ortalyq Azııa medıaforýmynda aımaqtyń aqparattyq yntymaqtastyǵyn jandandyrý, ortaq SilkWay telearnasyn qurý bastamalary aıtylǵan edi.