Áýe tasymalyn sýbsıdııalaý ishki týrızmdi damytýǵa septigin tıgizedi - Dáýren Abaev
ASTANA. QazAqparat - Qazaqstanda 16 baǵyt boıynsha áýe tasymalyn sýbsıdııalaýǵa 3 mlrd teńge jumsaý qanshalyqty paıdaly? Bul saýalǵa Habar arnasyndaǵy «Ashyq dıalog» baǵdarlamasynda bolǵan QR Aqparat jáne kommýnıkatsııalar mınıstri Dáýren Abaev jaýap berdi, dep habarlaıdy QazAqparat tilshisi.
«Jaqynda QR Investıtsııalar jáne damý mınıstrliginiń Azamattyq avıatsııa komıteti áýe saparlaryn 16 baǵyt boıynsha sýbsıdııalaý týraly habar taratqan bolatyn. Jańalyqqa kóp adamdar mán bermeı qalǵan syńaıly. 10 myń teńgege Alakólge ushyp jetý, álbette, kópke yńǵaıly bolar edi. Alaıda memleket tarapynan bıýdjettiń 3 mlrd teńgesin bul maqsatqa jumsaý qanshalyqty paıdaly?», - dep suraq qoıdy baǵdarlama júrgizýshisi.
Dáýren Abaevtyń bul saýalǵa bergen jaýabyna súıensek, mundaı sheshim eń aldymen halyqaralyq tájirıbege súıene otyryp, qabyldanady.
«Kóptegen elderde týrızm men aımaqtardy damytý úshin jolaýshylardyń áýe tasymaly sýbsıdııalanady. Bizge Memleket basshysy týrıstik salany damytý týraly tapsyrma bergen bolatyn. Áýe baǵdarlaryn damytý da óz kezeginde Qazaqstandaǵy týrıstik salaǵa ózindik paıdasyn tıgizeri anyq», - dedi Dáýren Abaev.
Mınıstrdiń aıtýynsha, ekinshiden mundaı sheshim aımaqtardaǵy avıatasymaldardy damytýǵa serpin beredi.
«Máselen, Qaraǵandy-Qyzylorda nemese Petropavl-Shymkent arasynda ushyp baratyndar Astana men Almaty arasyndaǵy jolaýshylardan az bolsa da, qalalar arasyndaǵy qashyqtyqty eskersek, mańyzdy. Bul rette jalpy Úkimet men Investıtsııalar jáne damý mınıstri úlken jumys atqarǵanyn erekshe atap ótý kerek», - dedi ol.
Mınıstr sonymen birge, ishki týrızmdi damytý baǵytyndaǵy jumystar qazirdiń ózinde bastalyp ketkenin aıtty.
«Máselen, ótken jyly bul kórsetkish 20 paıyzǵa artqan edi. Otanynda demalýdy 5,5 mıllıonǵa tarta qazaqstandyq qolaı kórdi. Alakóldiń ózinde bıyl 1 mıllıonǵa tarta týrıst demalǵan. Bul kórsetkishke jańa áýejaıdyń da arqasynda qol jetkizilgenin aıta ketý kerek. Bilesiz be, óz jerimizdiń tabıǵaty qanshalyqty baı ekenin baıqaı bermeımiz. Jańa áýe tasymaly osynaý bos oryndy toltyrar dep senemiz», - dedi Dáýren Abaev.
