Áýe tasymaldaýshylar Qazaqstandaǵy áýejaılarǵa ókpeli
ASTANA. QazAqparat - Áýejaılar qyzmetindegi tarıfterdi retteý sharalarynyń bolmaýy áýe kompanııalaryn alańdatyp otyr. Búgin Áýe kóligi halyqaralyq qaýymdastyǵynyń (International Air Transport Association, IATA, IATA) Ortalyq Azııa boıynsha óńirlik menedjeri Djordan Karamalakov osylaı aıtty, dep habarlaıdy QazAqparat.
«2017 jyly maýsymda áýejaılar engizetin halyqaralyq reısterge baǵany memleket retteýdi toqtatty. ıAǵnı, atalǵan retteýdi toqtatý saldary tek halyqaralyq reısterge Qazaqstandaǵy áýejaılyq tarıfterdiń artýyna alyp keldi. Sonymen qatar áýe tasymalyndaǵy joǵary otyn qunyn eskere otyryp, sheteldik eki áýe kompanııasy reısterden bas tartty, al taǵy birnesheýi tasymal jıilikterin qysqartýda», - dep toqtaldy Djordan Karamalakov elordada ótken baspasóz máslıhatynda.
Onyń sózine qaraǵanda, ótken jyldyń sońyna qaraı sheteldik tasymaldaýshylar úshin otyn baǵasy 20 paıyzǵa ósti. Osy jaǵdaılardy eskere kele, áýe tasymaldaýshylary ózderiniń avıatsııalyq qyzmetin josparlaýǵa qaýqarsyz bolatyndaı jaǵdaı týyndap otyr.
Óz kezeginde «Eır Astana» áýe kompanııasynyń qarjy jónindegi atqarýshy dırektory Ibrahım Janlyel Astanadan baǵdarlyq jelini damytýǵa nuqsan keltiretin táýekelder bar ekenin, bul turǵyda reısterdiń qysqarýy múmkin ekenin atap ótti.
Budan bólek, «SKAT» áýe kompanııasynyń kommertsııalyq dırektory Nıkolaı Býrıakov tarıfterdiń eleýli ósimi kóptegen qazaqstandyq áýejaılarda baıqalyp otyrǵanyn jetkizdi.
Onyń aıtýynsha, Aqtóbe, Atyraý áýejaılarynda kórsetiletin qyzmetterdiń quny artqanyn, bul jaǵdaı tasymaldaýshylar úshin qolaısyz bolyp turǵanyn sóz etti.
