Áýe tasymalyna qatysty aryz-shaǵym kóp — Úkimet basshysy

ASTANA. KAZINFORM — Úkimet basshysy Oljas Bektenov otandyq áýe qatynasy salasyndaǵy mańyzdy faktorlardy atady.

— Elimizdiń áýejaılary halyqaralyq standarttar boıynsha mýltımodaldi ortalyqqa aınalýǵa tıis. Bul ártúrli kólik túrlerimen jetkiziletin júkterdi qabyldaý jáne taratý qyzmetiniń sapasyn arttyrýǵa múmkindik beredi. Atalǵan is-shara áýe habyna avtomobıl jáne temirjoldardy tarta otyryp, ınfraqurylymdy jańǵyrtý jumystarymen qatar júrýge tıis. Júk tasymaly jáne olardy óńdeý boıynsha ozyq tsıfrlyq tehnologııalardy engizý kerek. Sondaı-aq jolaýshylarǵa eń joǵary standarttar boıynsha qyzmet kórsetý sapasyn arttyrýǵa erekshe nazar aýdaryńyzdar. Bul máselege qatysty aryz-shaǵym kóp, — dedi Oljas Bektenov Úkimet otyrysynda.

Osy oraıda Premer-mınıstr jolaýshylarǵa sapaly qyzmet kórsetýge qatysty problemalardy shuǵyl ári júıeli sheshý kerektigin aıtty. 

— Zamanaýı tsıfrlyq tehnologııalar operatsııalyq protsesterdi ońtaılandyrýǵa, jolaýshylarǵa qyzmet kórsetý isin jedeldetýge jáne shyǵyndardy azaıtýǵa múmkindik beredi, — deıdi ol.

Sondaı-aq Úkimet basshysy avıatsııa salasynyń týrızmdi damytýdyń mańyzdy faktory ekenine toqtaldy.

— Kendirli, Zaısan jáne Qatonqaraǵaı kýrorttyq aımaqtary aıqyndaldy. Olarda jańa áýejaılardyń qurylys jumystary jaqynda bastalyp, bıyl aıaqtalýy tıis. Kólik mınıstrligi shaǵyn avıatsııany damytý jumystaryn kúsheıtýi kerek. Búginde avıatsııa salasynyń ósý rezervteri jáne aldaǵy jylǵa arnalǵan mindetter aıqyndaldy. Degenmen, sheshimin tappaǵan suraqtar bar, — dep tolyqtyrdy O. Bektenov.

Buǵan deıin Úkimet otyrysynda áýe reısteriniń keshigýin azaıtý úshin jańa ushaqtar alynatyny aıtyldy.