Áýe tasymaly salasynda bılet qunyn qaıtaryp alý múmkin bola ma

ASTANA.KAZINFORM – Avıatasymaldaý salasynda aldyn ala bılet alyp qoıǵan jolaýshy saparynan bas tartsa, onyń aqshasy tolyqtaı qaıtarylmaıtyn júıe joıylýy múmkin. Bul týraly QR SIM Tutynýshylardyń quqyqtaryn qorǵaý komıteti tóraǵasynyń orynbasary Serik Qusaıynov aıtty.

— Áýe bıletteri jaıly aıtar bolsaq, ókinishke qaraı týrızm jáne týrıstik qyzmet, jolaýshylardy áýemen tasymaldaý salasynda sondaı bir olqylyq bar. Eger siz qandaı bir jaǵdaımen aldyn ala bılet alyp qoıǵan reıspen usha almaıtyn bolsańyz ne týrıstik saparǵa bara almaıtyn bop qalsańyz, onda osy bıznes sýbektileri sizdiń aqshańyzdy tolyqtaı ustap qala alady. Al temirjol salasynda tasymaldaýshy bundaı jaǵdaıda tek bılet qunynyń 30 paıyzyna deıingi sýmmany ustap qalýy múmkin. Bul jerde ádiletsizdik bar, sondyqtan osy máseleni depýtattarmen talqylap jatyrmyz. Bul keleńsizdik aldaǵy ýaqytta joıylady dep oılaımyn, - dedi ol «Tutynýshylardyń quqyqtaryn qorǵaý: bıznes, memleket jáne qoǵam dıalogy» atty forýmda.

Eske sala ketsek, elimizde 2023 jyldyń qyrkúıeginen beri Tutynýshylardyń quqyǵyn qorǵaý týraly jańa zań jobasy qaralyp jatyr. Qazir ol Májilistiń qaraýynda. 

Jańa zań qabyldanǵan soń tutynýshy 4 satyly shaǵymdaný kezeńderinen ótpesten, birden sotqa júgine alatyn bolady. 

Sondaı-aq tutynýshylar quqyǵyn qorǵaý ombýdsmeni ınstıtýty qurylady.

Odan bólek, elektrondyq saýda salasynda da ózgeris bolady.