Áýe taksıleriniń qyzmeti zań júzinde qalaı retteledi
ALATAÝ. KAZINFORM – Alataý qalasynda alǵashqy áýe taksıiniń jumysy tanystyryldy.
Atalǵan jobany júzege asyryp jatqan Alatau Advanced Air Group (AAAG) kompanııasynyń jobalyq menedjeri Danııar Tileýlın áýe taksıiniń jumysy zań júzinde qalaı retteletinin túsindirdi.
Onyń aıtýynsha, bul baǵytta zańnamaǵa ózgerister men tolyqtyrýlar engizý endi bastalyp jatyr.
- Jumys bastalyp ketti. Ózgeristerdiń alǵashqy toptamasyn Úkimettiń qaraýyna usyndyq, qazir bul zań jobasy QR Parlamentinde. Ekinshi jaǵynan, Alataý qalasynyń erekshe mártebesi týraly zańda «ozyq áýe mobıldiligi» degen uǵym jazylǵan. ıAǵnı, Alataý aýmaǵynda jolaýshylar men júk áýe tasymalyn damytýdyń alǵashqy irgetasy qalandy, - dedi ol.
Danııar Tileýlın zańnamaǵa usynylǵan ózgerister áýe mobıldiligin damyp jatqan AQSh, Qytaı, Ońtústik Koreıa jáne Taıaý Shyǵys elderiniń tájirıbesine súıene otyryp jasalǵanyn atap ótti.
Aıtýynsha, halyqaralyq tájirıbe negizinde zańnamaǵa eVTOL (tiginen ushyp-qonatyn elektrli áýe apparaty) jáne «vertıport» (tikushaq beketi) degen jańa uǵymdardy engizý usynylǵan.
- Osy uǵymdar kóliktiń bul jańa túrine arnalǵan aldaǵy standarttar men erejelerdiń negizi bolmaq. Al áýe taksıiniń jumysy men qaýipsizdigin Kólik mınıstrligi, Qazaqstannyń Avıatsııalyq ákimshiligi, sondaı-aq Qorǵanys mınıstrligine qarasty áýe qozǵalysyn basqarý organdary baqylaıdy. Odan bólek qurylys, energetıka, Tótenshe jaǵdaılar mınıstrligi sııaqty aralas salalardy úılestiretin birqatar memlekettik organdar bar, - dedi AAAG kompanııasynyń ókili.
Sonymen qatar ol jańa áýe turaqtaryn salý úshin Almaty ákimdigimen kelissózder júrgizilip jatqanyn aıtty.
Kelesi vertıportty Almaty halyqaralyq áýejaıynda salý josparlanyp otyr. Odan keıin Medeý, Oı-Qaraǵaı jáne Tuńǵysh Prezıdent syndy týrıstik oryndar qamtylady. Aldyn ala boljam boıynsha áýe taksıi 2028 jyldyń sońy nemese 2029 jyldyń basynda iske qosylady.
Eske salaıyq, Alataý qalasynda AutoFlight kompanııasynyń apparaty testilik rejımde ushyryldy.
