Áýe shabýylyna qarsy qorǵanys áskerine 30 jyl toldy

NUR-SULTAN. QazAqparat – 1992 jyly 19 maýsymda – Qorǵanys mınıstriniń Áýe shabýylyna qarsy qorǵanys áskerin qurý týraly dırektıvasyna qol qoıylǵan. Bıyl qurylymǵa 30 jyl toldy, dep habarlaıdy QazAqparat Qorǵanys mınıstrliginiń baspasóz qyzmetine silteme jasap.

Ásker quramyna Qazaqstan aýmaǵynda ornalasqan ÁShQQ korpýsynyń 37-shi quramalary men bólimderi kirdi. Atap aıtqanda zenıttik, zymyrandyq, radıotehnıkalyq jáne avıatsııalyq bólimder, sondaı-aq áýeaılaqtyq-tehnıkalyq bólimsheler, baılanys jáne radıotehnıkalyq qamtamasyz etý batalony.

Áýe shabýylyna qarsy qorǵanys áskerleriniń qalyptasýynyń basy-qasynda Halyq qaharmany armııa generaly Muhtar Altynbaev, avıatsııa general-maıory Anatolıı Vasımov, general-maıor Vladımır Bondarenko, general-leıtenant Oqas Saparov, general-maıor Nurjan Muqanov jáne basqada áskerıler turdy.

1998 jyly Áýe shabýylyna qarsy qorǵanys áskerleri Áýe qorǵanysy kúshteri quramyna kirdi.

Áýe shabýylyna qarsy qorǵanys áskeriniń aldynda áýeden elimizdiń ákimshilik-saıası, ónerkásiptik-ekonomıkalyq aýdandaryn qorǵaý, áýede qarsylaspen kúres júrgizý, sondaı-aq ornalasý pýnkteri men qurlyq áskeri toptarynyń marshrýttaryn, mańyzdy áskerı jáne basqa da obektilerdi avıatsııa men ushqyshsyz ushý apparattarynyń áýe soqqylarynan qorǵaý mindetteri tur. Áýe shabýylyna qarsy qorǵanys áskeriniń qarý-jaraǵynda túrli bıiktikter men jyldamdyqtaǵy áýe nysanalaryn der kezinde anyqtaýǵa jáne zaqymdaýǵa qabiletti zamanaýı zenıttik zymyran keshenderi men barlaý quraldary bar.

2020 jyly áýe shabýylyna qarsy qorǵanys áskeri qaıta jaraqtandyrý baǵdarlamasy boıynsha «BÝK-M2E» jańa zenıttik zymyran keshenimen tolyqty. Buǵan deıin elimizdiń barlyq áýe keńistigin baqylaýda ustaýǵa múmkindik beretin otandyq GM-403 «Nur» jáne «Rosa-RB» zamanaýı radıolokatsııalyq stantsııalary paıdalanýǵa engizilgen bolatyn. Aldaǵy ýaqytta áskerdi qazirgi zamanǵy jáne joǵary tehnologııalyq qarý-jaraq úlgilerimen odan ári jaraqtandyrý josparlanyp otyr.

ÁShQQ áskeri úshin joǵary kásibı ofıtserlik kadrlardy daıarlaýdy Almaty qalasynda ornalasqan Radıoelektronıka jáne baılanys áskerı ınjenerlik ınstıtýty júzege asyrady. JOO-da jattyǵý keshenderi, tehnıkasy jáne qarý-jaraǵy bar jeke polıgon, sondaı-aq barlyq qajetti oqý-materıaldyq baza bar.

Áýe shabýylyna qarsy qorǵanys áskerleriniń jeke quramy eldiń áýe keńistigin úzdiksiz baqylaýdy júzege asyra otyryp, táýlik boıy jaýyngerlik kezekshilikti atqarady.