Áýe shabýylyna qarsy qorǵanys áskerleriniń jaýyngerlik daıyndyǵy tekserildi
ASTANA. KAZINFORM — Qorǵanys mınıstriniń tárbıe jáne ıdeologııalyq jumys jónindegi orynbasary general-maıor Asqar Mustabekov jumys saparymen Aqmola garnızonynda ornalasqan 44813 áskerı bóliminde boldy, dep habarlaıdy Qorǵanys mınıstrliginiń baspasóz qyzmeti.
Sapar barysynda ulttyq qaýipsizdik júıesiniń negizgi býyndarynyń biri sanalatyn áýe shabýylyna qarsy qorǵanys bólimshesiniń jaýyngerlik daıyndyǵyna erekshe nazar aýdaryldy. Mınıstrdiń orynbasary jaýyngerlik kezekshiliktiń uıymdastyrylýymen, áskerı bólim ınfraqurylymynyń jaı-kúıimen jáne jeke quramnyń qyzmet ótkerý jaǵdaıymen jan-jaqty tanysty.
Sapar aıasynda bólimshelerdiń jaýyngerlik daıyndyǵy is júzinde tekserildi. Kezekshi kúshterdiń elimizdiń áýe keńistigin qorǵaý kezindegi is-qımyldary barynsha shynaıy jaǵdaıda pysyqtaldy. Jeke quramnyń úılesimdiligi men kásibıligin atap ótken general-maıor Asqar Mustabekov qyraǵylyq, tártip jáne turaqty daıyndyq memlekettiń áýe keńistigin senimdi qorǵaýdyń negizi ekenin atap ótti.
Jeke qurammen kezdesý barysynda áskerı qyzmetshilerdiń áleýmettik qorǵalý máselelerine aıryqsha kóńil bólindi. Qorǵanys mınıstrliginiń ókilderi áleýmettik paketke engizilgen sońǵy ózgeristerdi, sonyń ishinde «Turǵyn úı qatynastary týraly» zańǵa engizilgen jańa túzetýlerdi jan-jaqty túsindirdi.
— Memleket basshysynyń tapsyrmasyna sáıkes áskerı qyzmetshilerdi áleýmettik qoldaý sharalary men turǵyn úı máselelerin sheshý tetikteri kezeń-kezeńmen jetildirilýde. Bul jeke quramnyń erteńgi kúnge degen senimin nyǵaıtyp, Otanǵa adal qyzmet etýine jaǵdaı jasaıdy, — dep atap ótti general-maıor Asqar Mustabekov.
Jumys sapary aıasynda mınıstrdiń orynbasary merzimdi áskerı qyzmetshilermen kezdesip, «Sarbaz 2.0» baǵdarlamasynyń múmkindikterin talqylady. Atalǵan bastama jastardyń áleýmettik beıimdelýine yqpal etip, áskerı qyzmetten keıin bilim alý men kásibı ósý múmkindikterin keńeıtetini aıtyldy.
Ótken jyly áskerge shaqyrylǵan birqatar áskerı qyzmetshiniń qyzmetin kelisimshart negizinde jalǵastyrý týraly sheshim qabyldaǵany erekshe atap ótildi. Solardyń biri — 20 jastaǵy kishi serjant Erasyl Muratov.
— Men ótken jyldyń mamyr aıynda merzimdi áskerı qyzmetke shaqyryldym. Birneshe aıdan keıin kelisimshart boıynsha qyzmetimdi jalǵastyrýǵa sheshim qabyldadym. Qazir bólimshe komandırimin jáne baǵynystylarym úshin jaýapkershilikti sanaly túrde atqaryp kelemin, — dedi kishi serjant.
Jumys saparynyń qorytyndysy boıynsha áskerı bólim qolbasshylyǵyna tárbıe jumysyn odan ári jetildirý, jeke quramnyń moraldyq-psıhologııalyq jaǵdaıyn nyǵaıtý jáne eldiń áýe shebiniń qaýipsizdigin qamtamasyz etý jónindegi mindetterdi buljytpaı oryndaý týraly naqty tapsyrmalar berildi.
Budan buryn Qorǵanys mınıstrligi sarbazdarǵa qatysty taraǵan beınejazbaǵa pikir bildirdi.
