Áýe reısteriniń keshigýin azaıtý úshin jańa ushaqtar alynady — Mınıstrlik
ASTANA. KAZINFORM — Qazaqstannyń áýe parkinde 104 ushaq bar, jyl sońyna deıin taǵy 14 ushaqtyń kelýi kútilýde.

Bul tasymaldaý syıymdylyǵyn 15%-ǵa arttyrýǵa múmkindik beredi.
Kólik vıtse-mınıstri Talǵat Lastaevtyń aıtýynsha, salanyń turaqty damýyn qamtamasyz etýde áýe marshrýttarynyń kóbeıýi men áýe flotynyń jańarýy mańyzdy ról atqarady.
— Qazaqstanda ishki áýe tasymalyn 6 áýe kompanııasy 356 baǵyt boıynsha júzege asyrady. Ótken jyly marshrýttar sany 10%-ǵa artty, bul el ishindegi kólik qoljetimdiliginiń ósip kele jatqanyn kórsetedi. Áýe reısteriniń turaqtylyǵy 75%-dy quraıdy (EO — 74%, AQSh — 77%), bul álemdik kórsetkishterge sáıkes keledi, — dedi T. Lastaev Úkimettiń búgingi otyrysynda.
Sondaı-aq, spıker tasymal sapasyn arttyryp, reısterdiń keshigýin azaıtý úshin ushaq parkin jańartý jáne ulǵaıtý qajettigin aıtýda.
— Qazaqstandyq áýe kompanııalary jyl saıyn 10-15 jańa zamanaýı ushaq satyp alady. Qazirgi tańda eldiń áýe parki 104 ushaqtan turady. Bıyl áýe parki eki jańa Airbus A320 NEO laınerimen tolyqty. Jyl sońyna deıin taǵy 14 ushaqtyń kelýi kútilýde, bul tasymaldaý syıymdylyǵyn 15%-ǵa arttyrýǵa múmkindik beredi, — dedi vedomstvo ókili.
Avıahabtardy damytý jáne el áýejaılaryndaǵy júk aǵynyn ulǵaıtý boıynsha 6 áýejaı anyqtaldy. Osy maqsatta Astana, Almaty, Shymkent, Aqtóbe, Qaraǵandy, Aqtaý áýejaılarynda ınfraqurylymdy jańartý men logıstıkalyq protsesterdi jeńildetý sharalary josparlanǵan. Olardy júzege asyrý úshin 2 mlrd 100 mln dollar jeke ınvestıtsııa tartý josparlanýda.
Aqtaýda áýe, avtokólik, temirjol jáne teńiz tasymaldaryn biriktirip, júk aǵynyn qamtamasyz etetin tolyqqandy mýltımodaldy hab qurý kózdelgen. Habta ushaqtardy tehnıkalyq qyzmet kórsetý jáne jóndeý ortalyǵy, sondaı-aq mamandardy daıarlaý boıynsha oqý ortalyǵy qarastyrylǵan.
Aıta keteıik, ótken jyly qazaqstandyq áýe kompanııalar 15 mln-ǵa jýyq jolaýshy tasymaldaǵan.
Sondaı-aq, IKAO Qazaqstannyń azamattyq avıatsııa salasyn 2050 jylǵa deıin damytýdyń strategııalyq bas josparyn ázirleıdi.