Áýe reısteriniń turaqtylyǵy 3 paıyzǵa artty - QR KKM
ASTANA. 21 qarasha. QazAqparat - Aǵymdaǵy jyldyń 10 aıynda Qazaqstandaǵy áýe reısteriniń turaqtylyǵy 87,3 paıyzdy qurady.
Elimizdiń áýejaılary 46 015 áýe reısterine qyzmet kórsetse, onyń - 5818 reısi keshiktirilgen. QR Kólik jáne kommýnıkatsııa mınıstrliginiń málimetine qaraǵanda, ótken jyldyń atalǵan merzimimen salystyrǵanda áýe reısteriniń turaqtylyǵy 3% artyp otyr. Keshiktirýlerdiń negizgi sebepteri - áýe kemeleriniń ýaqytynan keshigip kelýi, áýejaılardaǵy meteo jaǵdaılar jáne ushaqtardyń tehnıkalyq aqaýlary.
QR Kólik jáne kommýnıkatsııa mınıstrligi Azamattyq avıatsııa komıteti tóraǵasynyń orynbasary Serik Myqtybaevtyń aıtýynsha, áýe reısteriniń ushý turaqtylyǵyn arttyrý maqsatynda mınıstrlik kún saıyn keshiktirilý oqıǵalaryna monıtorıng júrgizip otyrady. Budan basqa, «Keıbir zańnamalyq aktilerge kólik máselesi jóninde ózgertýler men tolyqtyrýlar engizý týraly» Qazaqstan Respýblıkasy Zańynyń jobasynda reısterdiń keshiktirilgeni úshin áýe tasymaldaýshylardy jaýapkershilikke tartý sharalaryn kúsheıtý qarastyrylǵan.
Reısterdiń keshiktirilý sebepteri, mundaı jaǵdaılardaǵy jolaýshylardyń quqyǵy men áýekompanııalarynyń jaýapkershiligi búgingi QR Kólik jáne kommýnıkatsııa mınıstrligi men «Astana halyqaralyq áýejaıy» AQ jáne «Eır Astana» AQ birlesip Astana áýejaıynda uıymdastyrǵan dóńgelek ústel basynda talqylandy.
Tájirıbe kórsetkendeı, jolaýshylardyń kópshiligi óz quqyqtaryn tolyq bilmeıdi jáne áýe kompanııalarynyń kinásinen reıster keshiktirilgen jaǵdaıda jolaýshylarǵa kórsetiler qyzmetter tolyq jazylǵan «Áýe kemelerinde jolaýshylardy, bagaj jáne júk tasymaldaý» erejelerimen de tanys emes. Birinshi kezekte, 7 jasqa deıingi balalary bar jolaýshylardy áýejaı (áýejaılarda keshiktirilý oryn alǵan jaǵdaıda) ana men balaǵa arnalǵan bólmege ornalastyrýy tıis. Sonymen birge jolaýshylardyń halyqaralyq baılanys júıesi arqyly eki ret, sóılesý uzaqtyǵy 5 mınýttan aspaıtyn qońyraý shalýǵa nemese reısti eki saǵattan astam ýaqyt kútken jaǵdaıda elektrondyq poshta arqyly 2 habarlama jiberýge quqyqtary bar. Eger ushý ýaqyty eki saǵattan artyq ýaqytqa keshiktirilgende jolaýshylar sýsynmen, al tórt saǵattan astam ýaqytqa keshiktirilgen jaǵdaıda ystyq tamaqpen qamtamasyz etýleri tıis. Al, kúndiz 8 saǵattan artyq ýaqytqa, túngi mezgilde 6 saǵattan astam ýaqytqa keshiktirilgen jaǵdaıda áýekompanııa jolaýshylardy qonaqúılerge ornalastyrýy tıis. Kútý ýaqyty 10 saǵattan asyp ketken jaǵdaıda jolaýshynyń qalaýy boıynsha bılettiń tolyq qunyn qaıtarady nemese eń jaqyn ýaqyttaǵy basqa reıspen ushýǵa quqyq beredi.
