Áýe reısterin keshiktirgen kompanııalarǵa 25 mln teńge aıyppul salyndy
ASTANA. QazAqparat – 2022 jyly 78,4 myń áýe reısiniń ishinen 5 myńnan astamy toqtatylǵan. Bul týraly Senatta áýe kóligi máselesin talqylaý kezinde QR Indýstrııa jáne ınfraqurylymdyq damý vıtse-mınıstri Almaz Ydyrysov aıtty, dep habarlaıdy QazAqparat tilshisi.
Osy oraıda ol 2,1 myń reıs operatsııalyq sebepter boıynsha, 2,9 myńy kommertsııalyq jaǵdaıǵa qatysty toqtaǵanyn aıtty.
Vıtse-mınıstrdiń sózine qaraǵanda, byltyr áýe reısteriniń turaqtylyǵy 74 paıyzdy qurasa, 2021 jyly bul kórsetkish 82 paıyz bolǵan. 2022 jyly reısterdiń keshigýiniń negizgi sebepteri retinde tehnıkalyq jaǵdaı (13%), jolaýshylarǵa qyzmet kórsetý, bagaj jáne júkti uzaq túsirý (16%), klımattyq jaǵdaılar (8%), adamı faktory – ekıpajdyń jetispeýi, shekara ári kedendik baqylaý jáne basqa da oqıǵalar áser etken.
«Áýe kóligimen tasymaldaýshynyń kinási dáleldense, biz ákimshilik jaýapkershilikke tartamyz. 2022-2023 jyldary jalpy somasy 8200 AEK-ti (25,2 mln teńge) quraıtyn 9 ákimshilik aıyppul salyndy», - dedi mınıstrdiń orynbasary.
