Áýe reısi keshiktirilgende tasymaldaýshydan neni talap etý kerek

ASTANA. QazAqparat - QR Investıtsııalar jáne damý mınıstrliginiń Azamattyq avıatsııa komıteti jolaýshylardyń áýe reısiniń ýaqyty  keshiktirilgende nemese ózgergende tasymaldaýshydan neni talap etý kerektigin jarııa etti, dep habarlaıdy QazAqparat.

Tasymaldaýshynyń kinásinen reıs keıinge qaldyrylǵanda nemese keshikkende, áýe kemesiniń kesh kelýine baılanysty reıs keıinge qaldyrylǵanda nemese keshikkende, baǵdar ózgergende tasymaldaýshy jolaýshylarǵa ushý pýnkti men aralyq pýnktterde birqatar qyzmetter kórsetýi tıis.

Atap aıtqanda, tasymaldaýshy:

-        7 jasqa deıin balasy bar jolaýshylarǵa ana men bala bólmesin (bolǵan jaǵdaıda) usynýǵa;

-        2 ret telefon qońyraýyn shalýyn, onyń ishinde halyqaralyq baılanys jelisi arqyly da 5 mınýttan aspaıtyn ýaqytqa nemese 2 saǵattan astam reıstiń ushýyn kútken jaǵdaıda elektrondy poshtamen 2 habarlama jiberýin qamtamasyz etýge;

-        Reıstiń ushýyn 2 saǵattan astam kútken jaǵdaıda sýsynmen qamtamasyz etýge;

-        Reıstiń ushýyn 4 saǵattan astam kútken kezde, odan ary kúndizgi ýaqytta árbir 6 saǵat saıyn, túnde árbir 8 saǵat saıyn ystyq tamaqpen qamtamasyz etýge;

-        Reıstiń ushýyn kúndizgi ýaqytta 8 saǵattan astam al túngi ýaqytta 6 saǵattan astam ýaqyt kútken kezde qonaq úıge ornalastyrýǵa;

-        Qonaq úı aqysyz negizde usynylǵan kezde áýejaıdan qonaq úıge deıin jáne keri baǵytta kólikpen qamtamasyz etýge mindetti.

Tasymaldaýshynyń kinásinen reıs 10 saǵattan astam ýaqytqa keshiktirilgende nemese ózgergende tasymaldaýshy jolaýshylardyń tańdaýy boıynsha:

-        Jolaýshyny bıletinde kórsetilgen dittegen jerine osy maqalanyń 1 tarmaǵynda kórsetilgen qyzmetterdi usyna otyryp jaqyn aralyqtaǵy reıspen tasymaldaýdy júzege asyrýǵa;

-        Jolaýshyǵa bılettiń tolyq qunyn óteýge mindetti.

Reıs keshiktirilgende, keıinge shegerilgende jolaýshylarǵa atalǵan qyzmetter boıynsha mindetterin oryndamaǵan nemese tıisti deńgeıde oryndamaǵan tasymaldaýshy Qazaqstannyń «Ákimshilik quqyq buzýshylyqtar týraly» kodeksiniń 567-babyna sáıkes ákimshilik jaýapkershilikke tartylyp, 200 AEK kóleminde aıyppul salynady. Bir jyldyń ishinde tasymaldaýshy mundaı buzýshylyqty taǵy qaıtalaıtyn bolsa, aıyppul kólemi 1 000 AEK-ke jetetin bolady.

Aıt keteıik, 1 AEK - 2 405 teńgeni quraıdy.