Áýe naryǵyndaǵy monopolııadan jolaýshylar zardap shegip keledi - Marat Omarov

ASTANA. QazAqparat - Búgin Astanada ótken báseke týraly forýmda Básekelestikti qorǵaý jáne damytý agenttiginiń tóraǵasy Marat Omarov áýe tasymaly naryǵyndaǵy monopolııa týraly aıtty, dep habarlaıdy QazAqparat.

Onyń aıtýynsha, bul naryqta suranys pen usynysty tolyq baqylaıtyn memlekettik kompanııalar toby – ulttyq avıatasymaldaýshy jáne onymen úlestes kompanııalar basym.

Memlekettiń qatysýymen avıakompanııalardyń aktıvterin bólý máselesi áli kúnge deıin óz sheshimin tappaǵan.

«Nátıjesinde, naryqtyń qoldanystaǵy qurylymy baǵa básekesi, shyǵyndardy ońtaılandyrý úshin yntalandyrýdy azaıtady. Bul reısterdiń júıeli keshigýine jáne baǵa ósimine ákeledi, nátıjesinde tutynýshylar zardap shegedi. Qoldanylatyn dınamıkalyq baǵa monopolııalyq naryqta jumys istemeıdi», - deıdi agenttik basshysy.

Mysaly, avıakompanııanyń eń joǵary tarıfi bir marshrýt boıynsha eń tómengi tarıften 4,5 ese asatyn keıster bar (67 743 / 14 743 tg).

Sondyqtan, qazirgi jaǵdaıda naryqqa jańa avıatasymaldaýshylarǵa qol jetkizý úshin «Ashyq aspan» rejımin kúsheıtý máselesi qarastyrylyp jatyr.