Áýe qozǵalysyna qyzmet kórsetý organdary IKAO standarttaryna sáıkes sertıfıkattaýdan ótkiziledi
ASTANA. 17 qańtar. QazAqparat - Qazaqstanda ushý qaýipsizdigin qamsyzdandyrý maqsatynda Áýe qozǵalysyna qyzmet kórsetý men ushýdy qamtamasyz etýshi radıotehnıkalyq jabdyqtaryn paıdalanýdy júzege asyratyn qyzmetterdi sertıfıkattaý erejeleri qoldanysqa endi. Bul týraly QR Kólik jáne kommýnıkatsııa mınıstrliginiń baspasóz qyzmetinen habarlandy.
Bul qyzmetter áýe qozǵalysyn retteıdi, ushý qaýipsizdigin jáne tıimdiligin qamsyzdandyratyn qajet aqparatty beredi. Engizilýdegi Erejeler óz kezeginde qyzmetterge sertıfıkattaý qaǵıdalaryn belgilep, sertıfıkatty berý, ýaqytsha toqtatý jáne qaıtarý tártibin anyqtaıdy.
Sertıfıkattaý erejeleri Azamattyq avıatsııa halyqaralyq uıymynyń (IKAO) sarapshylaryn iske tartý arqyly Azamattyq avıatsııa komıtetimen (AAK) ázirlengenin jáne IKAO standarttarynyń talaptarynan basqa Eýrobaqylaý sııaqty eýropalyq halyqaralyq avıatsııalyq uıymdar jınaqtaǵan ozyq tájirıbelerdi qosqanyn belgilegen jón.
«Sertıfıkattaýdy jáne onyń qaǵıdalarynyń buzylmaýyn turaqty baqylaýdy AAK Aeronavıgatsııa basqarmasynyń arnaıy oqýdan ótken ınspektorlary júzege asyrady», - dep habarlady QR KKM Azamattyq avıatsııa komıtetiniń tóraǵasy Beken Seıdahmetov.
2013 jyly Azamattyq avıatsııa komıtetiniń barlyq basqarmalary baqylaý-qadaǵalaý fýnktsııalaryn oryndaıtyn 40 bilikti memlekettik ınspektorlarmen jasaqtalǵanyn eske salamyz.
Bul sharalar basqa sharalar qatarynda IKAO-nyń 2009 jylǵy aýdıt qorytyndylary boıynsha eskertýlerdi joıýǵa baǵyttalǵan.
