Áýe qorǵanysy kúshteriniń bólimderinde jaýyngerlik ázirliktiń josparly tekserisi aıaqtaldy
ASTANA. QazAqparat - QR Qarýly Kúshterinde Taldyqorǵan jáne Úshtóbe garnızondarynyń áskerı bólimderin josparly tekserý aıaqtaldy. Bul týraly QR Qorǵanys mınıstrliginiń baspasóz qyzmetinen habarlady.
Vedomstvonyń aqparatyna sáıkes, ony ÁQK-niń bas qolbasshysy, avıatsııa general-maıory Nurlan Ormanbetovtiń basshylyq etýimen Áýe qorǵanysy kúshteri bas qolbasshylyǵynyń keshendi komıssııasy ótkizdi. Tekseris Taldyqorǵan garnızonynyń áskerı bólimderinen bastaldy. Onda jaýyngerlik daıarlyq, jaýyngerlik kezekshilikti uıymdastyrý, qarý-jaraq pen áskerı tehnıkanyń jaı-kúıi, tártip pen quqyqtyq tártip, moraldyq-psıhologııalyq jaı-kúı máseleleri tekserildi. Jaýyngerlik daıarlyq aıasynda ÁQK-niń bas qolbasshysy qarapaıym jáne kúrdeli pılotajǵa orta jáne shaǵyn bıiktikterde ushý quramynyń pılotajdaý sheberliginiń oryndalýyn tekserdi.
«Іs-sharanyń negizgi maqsaty jeke quramnyń jaýyngerlik mashyǵyn, áskerı bólimderdiń qoıylǵan jaýyngerlik tapsyrmalardy qysqa merzimde oryndaý ázirligin jan-jaqty tekserý, sondaı-aq bólimshelerdiń jaýyngerlik daıarlyǵy men úılesimdiliginiń deńgeıin baǵalaý boldy. Bizge ushý quramnyń praktıkalyq deńgeıin muqııat pysyqtap, olardyń arnalýy boıynsha tapsyrmalardy oryndaýǵa ázirligin baǵalaý qajet», - dedi Áýe qorǵanysy kúshteriniń bas qolbasshysy.
ÁQK bas qolbasshysynyń tárbıe jáne ıdeologııalyq jumystar jónindegi orynbasary polkovnık Turaly Qoıshyqulov ushý quramnyń moraldyq-psıhologııalyq daıyndyǵyn, tárbıe jáne ıdeologııadyq jumystyń uıymdastyrylýy men áskerı tártip pen quqyqtyq tártiptiń jaı-kúıin zerdeledi.
«Komandırler men nusqaýshylar olardyń tehnıkada jumys jasaýy kezinde myqty daǵdylary men júktelgen mindetterdi sátti oryndaýy úshin ushý jáne ınjenerlik-tehnıkalyq quramdy tıisti deńgeıde oqyp-úıretýi tıis. Olardyń alǵan bilimdi sheber qoldanýy men ózderiniń jaýyngerlik tehnıkasyn jaqsy bilýi mańyzdy», - dep atap ótti polkovnık T.Qoıshyqulov.
Tekseris aıaqtalǵannan keıin áskerler qyzmeti jáne áskerı tártipti nyǵaıtý jóninde usynymdar berildi, áskerı bólim komandırleri men olardyń orynbasarlaryna qajetti kómek kórsetildi.
