Áýe qorǵanysy kúshteriniń áskerı ınstıtýtynda jańa keshen iske qosyldy

NUR-SULTAN. QazAqparat – Qorǵanys mınıstri Nurlan Ermekbaev Aqtóbe, Atyraý jáne Mańǵystaý oblystaryna jumys saparymen baryp, ondaǵy áskerı bólimder men mekemelerdi aralaıdy, dep habarlaıdy QazAqparat.

Aqtóbede general-leıtenant Nurlan Ermekbaev Áýe qorǵanysy kúshteri áskerı ınstıtýtynda oqý-jattyǵý protsesiniń uıymdastyrylýyn tekserdi. Oǵan kafedralardyń oqý-jattyǵý materıaldyq bazasy, oqytý synyptarynyń jabdyqtary kórsetildi. Áskerı oqý ornynyń bastyǵy JOO-ny damytýdyń keleshektegi basym baǵyttary, atqarylǵan is-sharalar men aldaǵy josparlar týraly baıandady.

Instıtýt basshylyǵy ózderi jasap jatqan «Vırtýaldy áýe aılaǵynyń» jańa jattyqtyrý keshenin kórsetti. Bul keshen jeke ushaqtar men avıatsııa toptaryn qondyrý kezinde ushýdy basqarýǵa múmkindik beredi. Onyń kómegimen kýrsanttar ushý qaýipsizdigin baqylaý men qamtamasyz etýdiń negizderin zerdeleıdi. Keshenniń baǵdarlamalyq jasaqtamasy L-39 ushaǵynyń tórt jattyqtyrý qurylǵysymen jáne Mı-8MT tikushaǵynyń eki sımýlıatorymen biriktirilgen.

Bul jattyqtyrý qurylǵysyn ınstıtýttyń professorlyq-oqytýshylar quramy, al baǵdarlama jasaqtamasyn birinshi kýrstyń kýrsanty Álıhan Dáýletuly ázirlegen.

Qorǵanys vedomstvosynyń basshysy áskerı bazanyń obektilerin aralap kórip, bólimshelerdiń jaýyngerlik jáne jumyldyrý ázirliginiń, áskerı daıarlyqtyń jaı-kúıine qatysty bólim komandırin tyńdady, merzimdi qyzmettegi áskerı qyzmetshilerdi ornalasýymen, olardyń turmystyq jaǵdaıymen, qarý-jaraq pen áskerı tehnıkany saqtalýyn uıymdastyrýmen tanysty.

Qorǵanys mınıstri osy jumys sapary kezinde Atyraý men Aqtaý garnızondaryna da barýdy josparlap otyr.