Áýe qorǵanysy kúshteriniń áskerı ınstıtýty alǵashqy ınternder legin shyǵardy

NUR-SULTAN. QazAqparat – Eki márte Keńes Odaǵynyń Batyry Talǵat Bıgeldınov atyndaǵy Áýe qorǵanysy kúshteri áskerı ınstıtýty ınternatýra baǵdarlamasy boıynsha oqýdy aıaqtaǵan dárigerlerge dıplom tapsyrdy, dep habarlaıdy QazAqparat Qorǵanys mınıstrliginiń baspasóz qyzmetine silteme jasap.

Jýyrda Qarýly Kúshter qataryn tolyqtyratyn medıtsınalyq qyzmettiń 15 jas ofıtseri jalpy praktıka dárigeri, hırýrg jáne terapevt biliktiligi berilgen dıplomdar men kýálikterge ıe boldy. Bul – 2016 jyly áskerı ushqyshtar daıarlaıtyn ınstıtýttyń bazasynda qurylǵan medıtsınalyq fakýltettegi áskerı ınternderdiń alǵashqy legi.

Medıtsına qyzmetiniń leıtenanttary Marat Ospanov atyndaǵy Batys Qazaqstan medıtsına ýnıversıtetiniń ınternatýrasynyń úlgilik kásiptik oqý baǵdarlamasy boıynsha bilim aldy. Internder Aqtóbedegi medıtsınalyq mekemelerde klınıkalyq tájirıbeden ótti.

«Áskerı dáriger bolý – Otan aldyndaǵy abyroıly mindet jáne zor jaýapkershilik. Adamdardyń ómiri men densaýlyǵy úshin kúreste dárigerdiń antyna ǵana emes, áskerı sertińe da adal bolýyń kerek», – dep atap ótti Áýe qorǵanysy kúshteri áskerı ınstıtýtynyń bastyǵy, avıatsııa general-maıory Dáýren Qosanov jas mamandarǵa arnaǵan sózinde.

Búginde bul oqý ornynda áskerı ınternatýra baǵdarlamasy boıynsha 23 medıtsına qyzmetkeri bilim alady. Bastapqy akademııalyq baǵdarlama boıynsha 12 dáriger-kýrsant oqyp jatyr. Sondaı-aq, bilim ordasy 25 áskerı dárigerdi oqýǵa qabyldaýǵa daıyn.