Áýe qorǵanysy kúshteri Bas qolbasshysynyń orynbasary, general-maıor Asqar Bóldeshev sot sanktsııasymen qamaýǵa alyndy

ASTANA. 29 sáýir. QazAqparat - QR Qorǵanys mınıstrligi Áýe qorǵanysy kúshteri Bas qolbasshysynyń orynbasary, general-maıor Asqar Bóldeshev Aqmola garnızonynyń áskerı sotynyń sanktsııasymen qamaýǵa alyndy. Bul týraly búgin QR Joǵarǵy Sotynda ótken brıfıngte Aqmola garnızonynyń áskerı sotynyń tóraǵasy Dáýlet Moldabaev málim etti.

"Sotqa kúdiktini qamaýǵa alý týraly bultartpaý sharasyn qoldaný týraly ótinishti QR IIM Tergeý komıteti áskerı-tergeý basqarmasynyń tergeýshisi berdi. Ótinishti bas áskerı prokýrordyń orynbasary qoldady", - dedi D. Moldabaev.

Oǵan qatysty Qylmystyq Kodekstiń 380-1 babynyń 2-bóliminiń "b" tarmaǵy boıynsha, bıligin jáne qyzmet babyn asyra paıdalaný arqyly aýyr jaǵdaılarǵa soqtyrý faktisi boıynsha qylmystyq is qozǵalǵan. Bul qylmys túri aýyr qylmysqa jatady jáne 10 jylǵa deıin bas bostandyǵynan aıyrý jazasy qarastyrylǵan. Eske sala keteıik, general-maıor áskerı tehnıkany, sonyń ishinde eldiń jaýyngerlik áýeparkindegi ushaqtardy jóndeýden ótkizý barysynda qyzmet babyn asyra paıdalandy dep kúdiktelýde.