Áýe qorǵanysy kúshteri jasandy ıntellekt elementteri bar júıelerdi synady
ASTANA. KAZINFORM — Saryshaǵan polıgonynda «Batyl toıtarys — 2026» strategııalyq komandalyq-shtabtyq oqý-jattyǵýy aıasynda Áýe shabýylyna qarsy qorǵanys áskerleri men Áskerı-áýe kúshteriniń «Ashyq aspan — 2026» birlesken oqý-jattyǵýy aıaqtaldy.
Oqý-jattyǵýǵa Qorǵanys mınıstriniń orynbasary — Áýe qorǵanysy kúshteriniń Bas qolbasshysy general-maıor Qaırat Sadyqov basshylyq etti.
Oqý-jattyǵýdyń negizgi maqsaty — áskerı basqarý organdary men bólimshelerdiń áýe shabýyly quraldarynyń jappaı soqqylaryna toıtarys berýge daıyndyǵyn tekserý. Áskerı qyzmetshiler avıatsııa, Áýe shabýylyna qarsy qorǵanys áskerleri men radıoelektrondyq kúres bólimsheleriniń ózara is-qımylyn, sondaı-aq jedel manevr jasaýdy jáne atys mindetterin oryndaǵannan keıin pozıtsııalardy aýystyrýdy pysyqtady.
Ushqyshsyz ushý apparattarynyń ártúrli túrlerine qarsy is-qımyl jasaýǵa jáne Áýe shabýylyna qarsy qorǵanystyń eshelondy júıesin qoldanýǵa erekshe nazar aýdaryldy. Oqý-jattyǵý barysynda bólimsheler syrtqy nysanany kózdeý quraldaryn paıdalana otyryp, atys quraldaryn jasyryn ornalastyrýdy qamtıtyn áýe shabýylyna qarsy tutqıyldan soqqy berý taktıkasyn da pysyqtady.
Praktıkalyq kezeńde Áýe shabýylyna qarsy qorǵanystyń eshelondy júıesi quramynda S-75 zenıttik-zymyran kesheni qoldanyldy. Sonymen qatar radıolokatsııalyq quraldar men radıoelektrondyq kúres keshenderi biryńǵaı aqparattyq-barlaý keńistigine biriktirildi.
Taǵy bir jańashyldyq — S-300PS zenıttik-zymyran keshenin jerdegi nysanany joıý úshin qoldaný boldy. Zymyran ushyrý barysynda belgilengen nysana sátti joıyldy. Bul keshenniń jerdegi nysanalardy joıý mindetterin oryndaý kezindegi múmkindikterin baǵalaýǵa múmkindik berdi.
Budan bólek, áskerı qyzmetshiler sheshim qabyldaýdy pysyqtaýǵa arnalǵan jasandy ıntellekt elementteri bar avtomattandyrylǵan basqarý júıelerin synaqtan ótkizdi. Alynǵan tájirıbe Áýe qorǵanysy kúshteri áskerlerin daıarlaý men qoldaný júıesin odan ári jetildirý barysynda paıdalanylatyn bolady.
— Biz bólimshelerdiń áýe jaǵdaıy jyldam ózgeretin kezde úılesimdi áreket etý qabiletin tekserdik. Avıatsııa, Áýe shabýylyna qarsy qorǵanys jáne radıoelektrondyq kúres kúshteriniń ózara is-qımylyn pysyqtadyq. Alǵa qoıylǵan mindetter tolyq kólemde oryndaldy, — dep atap ótti Áýe shabýylyna qarsy qorǵanys áskerleriniń qolbasshysy polkovnık Ádil Súbebaev.
Oqý-jattyǵý qorytyndysy boıynsha bólimshelerdiń áýe jaǵdaıynyń ártúrli sharttarynda mindetterdi oryndaý daıyndyǵyna baǵa berildi. «Ashyq aspan — 2026» oqý-jattyǵýy barysynda jınaqtalǵan tájirıbe áskerlerdi daıarlaýdy odan ári jetildirý júıesinde eskeriletin bolady.
Aıta ketelik Qarýly kúshterde drondarǵa qarsy qorǵanys tásilderi jetildirip jatqany týraly jazǵan edik.
